Veg­farandi á sjúkra­hús og Kringlumýrar­braut lokað eftir þriggja bíla á­rekstur

Stefán Kristinsson, varðstjóri hjá Slökkviliði höfuðborgarsvæðisins, segir um að ræða „hálkuslys.“ Mbl.is greindi fyrst frá.

„Bílar runnu saman þarna og síðan í kjölfarið á því er ekið á gangandi,“ segir Stefán. Sá einstaklingur hafi verið í einum bílnum en kominn út þegar ekið var á hann. Slasaðist hann töluvert við það og var fluttur á slysadeild.

Tveir sjúkrabílar voru sendir á vettvang. Stefán bætir við að fleiri slys hafi átt sér stað á svipuðum slóðum í dag en ekkert jafn alvarlegt. 

 Atvikið átti sér stað í Kópavogi rétt fyrir neðan Hamraborgina.

Samkvæmt frétt Mbl.is voru lögreglubílar hjá Suðurveri að beina umferð frá Kringlumýrarbraut en lögreglan mun hafa lokað fyrir umferð af Bústaðavegi og í suður. Áætlað er að nokkuð hált sé á svæðinu.

Ekki hefur náðst í lögreglu en af umferðarmyndavélum að dæma virðist bílaumferð á Kringlumýrarbraut vera komin aftur í eðlilegt horf.

Fréttin hefur verið uppfærð.