Unnu þrí­tugasta sigurinn í röð í nótt

Miami vann þá 74-72 sigur á Toledo í enn einum spennuleiknum hjá liðinu að undanförnu. Miami er því áfram eina ósigraða liðið í efstu deild karla í bandaríska háskólakörfuboltanum. Þeir eru líka aðeins fjórða liðið á síðustu 35 árum til að byrja tímabilið 30-0, ásamt liðum Wichita State 2013-14, Kentucky 2014-15 og Gonzaga 2020-21.

Með sigrinum tryggði Miami sér auk þess sinn fyrsta MAC-deildarmeistaratitil síðan tímabilið 2004-05, framlengdi bestu byrjun í sögu skólans og bætti við skólamet sitt í fjölda sigra á einu tímabili. Miami státar einnig af bestu byrjun og lengstu sigurgöngu í sögu MAC-deildarinnar.

Miami-strákarnir voru að koma úr 69-67 sigri á Western Kentucky á föstudagskvöld, þar sem þeir þurftu á flautukörfu frá nýliðanum Trey Perry að halda. Í leiknum á þriðjudag náðu þeir snemma meira en tíu stiga forystu gegn Rockets og voru aldrei undir í leiknum.

Toledo minnkaði aftur á móti muninn í eitt stig fjórum sinnum undir lokin og það leit út fyrir að þeir myndu ná forystunni en Miami hélt út.

Þetta var sjöundi leikur liðsins sem réðst með þremur stigum eða minna og þeir hafa því náð að vinna fjölda svona jafnra leikja í vetur.

Almar Orri átti alls ekki sinn besta leik, hitti aðeins úr einu skoti af fjórum og var með fleiri tapaða bolta (4) en stig (2). Hann var líka með eitt frákast, eina stoðsendingu og einn stolinn bolta.