Ronda snýr aftur í búrið á Netflix

Ronda mun mæta Ginu Carano þann 16. maí en bardagakvöldið verður fyrsta MMA-bardagakvöldið sem er sýnt á Netflix streymisveitunni. Bardagi þeirra verður aðalbardagi kvöldsins.

Um er að ræða fimm lotu bardaga í fjaðurvigt. Bardagakvöldið fer fram í Los Angeles.

Það er fyrirtæki hins umdeilda Jake Paul, Most Valuable Promotions eða MVP, sem á veg og vanda að þessu kvöldi. Eftir á að kynna aðra bardaga kvöldsins.

Rousey er orðin 39 ára gömul og hefur ekki barist síðan í lok árs árið 2016. Þá rotaði Amanda Nunes hana. Rúmu ári áður hafði Rousey tapað fyrir Holly Holm.

Þó svo Rousey hafi rutt brautina fyrir aðrar konur í MMA þá telja margir að hún hafi ekkert að gera í MMA-konur nútímans. Þær séu einfaldlega miklu betri.

Þá er hentugt að andstæðingurinn sé hin 43 ára gamla Carano sem var stærsta kvennastjarnan í MMA áður en Ronda mætti og tók yfir sviðið. Árið 2007 barðist Carano í fyrsta kvennabardaganum sem var sýndur í sjónvarpi á Showtime. Hún braut fyrstu múrana áður en Ronda mætti og valtaði yfir alla hina.

Síðasta bardagi Carano var árið 2009 er hún tapaði gegn Cris Cyborg. Það er eina tapið hennar á ferlinum en hún barðist reyndar aðeins átta sinnum.