Stiven í ham í Portúgal

Stiven skoraði átta mörk í leiknum og skaraði fram úr í liði Benfica en næsti maður var með fimm mörk.

Benfica náði fljótt forystunni og var fjórum mörkum yfir í hálfleik, 21-17.

Sigurinn kemur liðinu aftur upp í 2. sæti deildarinnar, eftir tvö töp í röð gegn Águas Santas og Sporting sem er enn með öruggt forskot á toppnum enda með fullt hús stiga.

Í Svíþjóð skoraði Arnór Viðarsson fjögur mörk fyrir Karlskrona sem vann Ystad, 33-29, þrátt fyrir að vera enn án Ólafs Guðmundssonar.

Í Noregi varð svo Íslendingalið Kolstad að sætta sig við afar svekkjandi tap gegn Arendal, 31-30, þar sem Sigvaldi Björn Guðjónsson skoraði fjögur mörk og Benedikt Gunnar Óskarsson eitt. Markvörðurinn Sigurjón Guðmundsson er svo þriðji Íslendingurinn í liði Kolstad og átti hann mjög góðan leik, með 38% markvörslu, samkvæmt skýrslu á vef norska handknattleikssambandsins.