Stærsta flugmóðurskip heims sent aftur til Mið-Austurlanda

Bandaríkjamenn hafa þegar sent flugmóðurskipið USS Abraham Lincoln til Mið-Austurlanda, auk annarra herskipa, fjölda herflugvéla og önnur hergögn og loftvarnarkerfi á svæðið.

Í vikunni bárust svo fregnir af því að Trump væri að íhuga að senda annað flugmóðurskip til Mið-Austurlanda og í gær sagði Wall Street Journal frá því að stjórnendum flugmóðurskipsins USS George H.W. Bush hefði verið skipað að undirbúa ferð þangað.

Sjá einnig: Íhugar að senda annað flugmóðurskip til Mið-Austurlanda

Í gærkvöldi gaf Trump svo þá skipun að flugmóðurskipið USS Gerald Ford yrði sent aftur til Mið-Austurlanda. Þar var skipið í fyrra en því var siglt til Karíbahafsins undir lok ársins, þar sem áhöfn þess hefur tekið þátt í árásum á báta sem eiga að hafa verið notaðir til þess að smygla fíkniefnum.

Skipið var einnig notað þegar Nicolás Maduro, fyrrverandi forseti Venesúela, var numinn á brott af bandarískum hermönnum.

Ein viðræðulota hefur átt sér stað milli erindreka frá Bandaríkjunum annars vegar og klerkastjórnarinnar hins vegar. Þær fóru fram í Óman en skiluðu engri niðurstöðu.

Trump sagði á dögunum að til stæði að halda nýjar viðræður en þær hafa ekki átt sér stað og er óljóst hvort og hvenær þær eiga að gerast. Þess í stað hafa skilaboð gengið á milli fylkinga gegnum milliliði í Óman og Katar, samkvæmt AP-fréttaveitunni.

Forsetinn hefur sagt að árásir gegn klerkastjórninni komi til greina en ráðamenn í öðrum ríkjum í Mið-Austurlöndum hafa varað við þeim. Þeir óttast að þær gætu leitt til umfangsmeiri átaka á svæðinu.