Ljúft eftir að hafa tapað tveimur úrslitaleikjum í röð

Mikið var fagnað í Vesturbæ Reykjavíkur á laugardag þegar liðið lagði Íslandsmeistara Stjörnunnar í úrslitaleik bikarsins. Um var að ræða fyrsta titil liðsins í sjö ár og bið eftir slíkum því á enda eftir langa titlahrinu þar á undan.

Það hefur eðlilega mikla þýðingu fyrir Vesturbæinga og það þekkir uppaldi Vesturbæingurinn og lykilmaður KR, Þórir Guðmundur Þorbjarnarson vel.

„Það var ótrúlega gaman að sjá alla hafa gaman og allir glaðir. Allir þessir KR-ingar. Við erum á vegferð með þetta lið og það er virkilega ánægjulegt að geta skilað titli núna,“ segir Þórir.

Tapaði tveimur í röð fyrir þennan

Þórir var hluti af KR liði sem grúttapaði úrslitaleik bikarsins fyrir Val í fyrra og það reyndist mönnum hvatning þegar á hólminn var komið aftur í ár.

„Já, klárlega. En svo fór ég árið á undan líka með Stólunum í höllina svo þetta var þriðji úrslitaleikurinn í röð. Sem betur fer hafðist það að vinna. Við lærðum fullt af því að fara þarna í fyrra. Að mæta þarna með KR-fólkinu okkar uppi í stúku og finna fyrir orkunni var gríðarlega mikilvægt og gott fyrir okkur. Að ná þessu yfir línuna var virkilega gott,“ segir Þórir.

Stuðningurinn úr stúkunni hlýtur að hafa gefið ykkur mikið?

„Alveg klárlega. Maður elst upp við þetta, fer í gegnum þetta, fyrst er maður í stúkunni og svo á vellinum. Það er ótrúlega góð tilfinning að finna fyrir stúkunni,“ segir Þórir.

Markmiðið er að halda uppbyggingunni áfram.

„Að ná að vinna þessa tvo leiki sýnir að við getum keppt við efri liðin. Núna tekur deildin við og fullt af hörkuleikjum fram undan. Við þurfum að mæta af krafti í þá leiki til að koma okkur í sem besta stöðu fyrir úrslitakeppnina,“ segir Þórir.

Fleira kemur fram í viðtali við Þóri sem má sjá í heild sinni að neðan.