Lindsey Vonn úr leik eftir hrika­legt fall í fyrstu ferð

Hin 41 árs gamla Vonn ögraði örlögunum með því að keppa á Vetrarólympíuleikunum aðeins níu dögum eftir að hafa slitið krossband.

Slík meiðsli halda íþróttafólki vanalega frá keppni í 9-12 mánuði en Vonn setti á sig hnébeisli og lét þau ekki stoppa sig frá keppni á, að öllum líkindum, síðustu leikunum á ferlinum.

Vonn var vongóð eftir æfingar í Ólympíubrautinni í Cortina, þar sem hún stóð sig með prýði.

Illa fór hins vegar í fyrstu ferð. Vonn missti stjórn á sér og festi höndina í flagginu þegar hún þaut framhjá á yfir hundrað kílómetra hraða, með þeim afleiðingum að hún tók á loft. Vonn snerist í loftinu og féll harkalega til jarðar.

Hún festist í skíðunum í mjög óþægilegri V-stellingu og lá hreyfingarlaus í brekkunni. Það tók síðan rúmlega tíu mínútur að losa hana úr skíðunum og flytja hana burt úr brekkunni með sjúkraþyrlu.

Dauðaþögn sló meðal áhorfenda á svæðinu en þögnin var rofin með öskrum hinnar sárkvöld Vonn. Skelfileg sjón fyrir alla viðstadda og áhorfendur í sjónvarpi.

„Ég vil ekki trúa því að þetta endi með þessum hætti, hreyfingarlaus og sárkvalin í brekkunni. Þetta er átakanlegt, þetta er grimmt. Hugsið ykkur hvað fjölskyldan hennar, liðið hennar og hún er að ganga í gegnum.

Við verðum að vera raunsæ. Áhættan var mjög mikil, áhættan magnast þegar hún dettur, líkaminn hennar höndlar þetta ekki. Þau klappa núna og vona að það verði í lagi með hana, en það er líka búið að kveikja á háværri tónlist því þetta er svo óþægilegt“ sagði Chemmy Alcott, fjórfaldur Ólympíufari og fyrrum keppinautur Lindsey Vonn, í lýsingu BBC þegar Vonn var flutt burt.