Handbolti á Vetrar­ólympíu­leikum í fram­tíðinni?

Í framtíðinni gæti bæði orðið boltkast og glíma á Vetrarleikunum. „Ég veit að breytingar eru ekki auðveldar. Ég veit að umræðurnar verða erfiðar. En við verðum að skoða íþróttirnar okkar og gera okkur grein fyrir því að leikarnir verða að breytast í takt við heiminn,“ sagði Kirsty Coventry, forseti Alþjóðaólympíunefndarinnar, IOC, í opnunarræðu sinni þegar nefndin kom saman á þriðjudagsmorgun.

Standa frammi fyrir stórri áskorun

Alþjóðaólympíunefndin (IOC) hefur nefnilega lengi staðið frammi fyrir stórri áskorun: Sumarólympíuleikarnir eru þegar yfirfullir. Áhugi á Vetrarólympíuleikunum fer minnkandi. Og vegna loftslagsbreytinga eru, að sögn IOC, kannski aðeins tíu lönd sem geta haldið Vetrarleikana með núverandi greinum.

Nú eru lausnirnar ræddar. Það gæti endað með því að Vetrarólympíuleikarnir líti allt öðruvísi út í framtíðinni.

Norska ríkisútvarpið hefur rætt við nokkra heimildarmenn innan IOC sem benda á fjölda mismunandi lausna. Meðal möguleikanna er að flytja ákveðnar innanhússíþróttir frá Sumarólympíuleikunum yfir á Vetrarólympíuleikana. Íþróttir eins og handbolti, körfubolti, glíma og hnefaleikar hafa verið nefndar.

Forseti Alþjóðahjólreiðasambandsins, David Lappartient, vill einnig hugsa um útiíþróttir. Hann vill einfaldlega fá hjólreiðagreinar á dagskrá Vetrarólympíuleikanna árið 2030.

„Fyrir veturinn hugsum við um hjólakross. Við teljum að fjallahjólreiðar hafi alltaf verið sumargrein og að hjólakross hafi alltaf verið vetrargrein – sem er alltaf stunduð á milli nóvember og febrúar,“ sagði Lappartient við NRK og fjölda alþjóðlegra miðla.

„Sem meðlimur IOC verður maður að skoða hvort það sé gott fyrir leikana og ég tel í einlægni að það að hafa nokkrar vetrargreinar, eins og hjólakross, geti verið góð viðbót“ sagði Lappartient.

Ekki allir sammála

Ekki eru allir sammála. Karl Stoss stýrði nefndinni sem vinnur að dagskrá Ólympíuleikanna til ársins 2025.

„Við gætum misst sjálfsmynd vetraríþrótta ef við tökum inn sumaríþróttir líka. Þannig að að mínu mati er betra að halda sig eingöngu við vetraríþróttir,“ sagði Stoss.

Bæði Lappartient og Stoss eru skýrir á því að ís og snjór séu DNA og sjálfsmynd vetrarleikanna. Þeir vilja ekki að því verði breytt, en segja um leið að það verði að hugsa út fyrir rammann.

Á Vetrarólympíuleikunum sem voru settir á föstudaginn eru 92 mismunandi lönd með fulltrúa. Á Sumarólympíuleikunum fyrir tveimur árum voru meira en tvöfalt fleiri þjóðir.

Kirsty Coventry, forseti IOC, leggur meðal annars áherslu á mikilvægi þess að fá fleiri þjóðir með á Vetrarleikana.

Finna jafnvægið milli hefðar og nýsköpunar

„Við verðum að tryggja að leikarnir haldi áfram að vera hvetjandi fyrir íþróttafólk í öllum löndum. Við verðum að finna jafnvægið milli hefðar og nýsköpunar. Það þýðir að við verðum að skoða íþróttirnar okkar með ferskum augum og tryggja að við þróumst með tímanum,“ sagði Coventry.

Þótt íþróttir eins og skíðaganga og skíðastökk séu stórar í Noregi er áhuginn á alþjóðavettvangi allt annar. Forseti IOC var skýr á því að núverandi líkan væri ekki það rétta. Aðspurður af NRK vill forseti IOC ekki vera nákvæmur um hugsanlegar breytingar.

Dagskrárnefnd ÓL skoðar málið

„Ég vildi óska þess að ég gæti verið nákvæmari, en ég get það ekki því ég hef beðið dagskrárnefnd Ólympíuleikanna um að skoða málin með alveg nýjum og ferskum augum. Þannig að ég vildi óska að ég gæti gefið þér það, en við erum mitt í öllum þessum ferlum, svo við höfum engar sérstakar, fastar hugmyndir um íþróttir akkúrat núna“ sagði Coventry við NRK.

Stoss bendir jafnframt á að loftslagsbreytingar geri það að verkum að menn verði að vera opnir fyrir því að nýjar íþróttir geti komið inn sem „ferskur andblær“.

Samkvæmt nýlega birtri rannsókn munu aðeins 12 af 22 fyrri gestgjöfum Vetrarólympíuleikanna geta haldið leikana árið 2080. Stoss sjálfur reiknar með að árið 2050 gætu tíu lönd í raun haldið Ólympíuleikana.

Skuli fara fram á snjó og ís

Í reglum Alþjóðaólympíunefndarinnar stendur nefnilega í dag að íþróttir Vetrarólympíuleikanna skuli fara fram á snjó og ís. Þeirri reglu verður nú líklega breytt þegar vinna við framtíðarólympíuleikana verður lögð fyrir Alþjóðaólympíunefndina í júní.

„Við verðum að vera heiðarleg um hvað virkar og hvað er ekki nógu gott. Þegar við gerum mistök verðum við að hafa nægan kjark til að segja að við viljum gera betur næst,“ sagði Coventry.