„Vona að við getum haldið Ólympíu­leika sem snúast ekki um typpi“

Þýski miðillinn Bild greindi fyrst frá því að skíðastökkvarar væru að sprauta hýalúronsýru í göndulinn til að stækka hann, með það í huga að mega þá klæðast örlítið stærri keppnisbúningi sem myndi gera þeim kleift að svífa lengra.

Málið hefur vakið heimsathygli og verið fjallað um á BBC, Sky Sports og New York Times til dæmis.

Noregur er sigursælasta þjóð sögunnar í skíðastökkinu og norski ríkismiðillinn NRK leitaði viðbragða hjá öllum helstu sérfræðingum íþróttarinnar. Þeir eiga það sameiginlegt að finnast fregnirnar ótrúlegar og þvertaka fyrir það að hafa notað typpasýruna sjálfir eða þekkja einhvern sem hefur gert það.

„Þetta er ekki góðs viti fyrir íþróttina, alls ekki“ sagði Johan Remen Evensen, fyrrum heimsmeistari í skíðastökki.

„Mikil umræða hefur skapast undanfarið um búninga og svoleiðis hluti, þannig að það þetta kemur því miður ekki á óvart. En þetta er bara orðrómur og ég trúi því og vona að við getum haldið Ólympíuleika sem snúast ekki um typpi“ sagði Evensen einnig.

Þetta er í þriðja sinn á síðustu fjórum árum sem búningamál skíðastökksins eru í deiglunni. Á síðustu Vetrarólympíuleikum, í Peking 2022, voru fimm konur frá fjórum þjóðum dæmdar úr leik fyrir að hafa átt við búningana með ólöglegum hætti.

Saumaskandallinn þá var síðan toppaður á heimsmeistaramótinu í fyrra, þegar fimm norskir keppendur auk þjálfara þeirra voru dæmdir í keppnisbann fyrir að eiga við búninga.

„Það er sorglegt að við þurfum skandala svo fólki finnist íþróttin okkar áhugaverð eða spennandi“ sagði skíðastökkvarinn Anna Odine Stroem við BBC.