Martin með ellefu stig í magnaðri endur­komu Alba Berlin

Liðin mættust í Uber höllinni í Berlín og það voru gestirnir frá Grikklandi í liði Karditsa sem réðu ferðinni í leiknum nær allan tímann og komust mest í tíu stiga forystu um miðbik þriðja leikhluta. 

Fyrir fjórða og síðasta leikhlutann voru Grikkirnir sjö stigum yfir 57-64 en magnaður endasprettur hjá Alba Berlin og einna helst stórkostlegt framlag frá hinum þýska Jack Kayil ,sem setti niður tíu stig í fjórða leikhluta einum og sér, sá til þess að þýska liðið vann að lokum fjögurra stiga sigur, 84-80. 

Martin Hermannsson spilaði um sextán mínútur í leik kvöldsins, setti niður ellefu stig og gaf þrjár stoðsendingar. 

Sigurinn gerir það að verkum að Alba Berlin er nú með fimm stig að loknum þremur umferðum J-riðli Meistaradeildarinnar með stigi minna en topplið AEK. Efstu tvö lið hvers riðils fyrir sig að lokinni riðlakeppninni tryggja sig áfram í keppninni.