Danir láta Gísla heyra það eftir gagn­rýni: „Haltu kjafti Ís­land“

Í viðtali bæði við Vísi sem og TV 2 eftir leik gagnrýndi Gísli Þorgeir norska dómaraparið sem sá um að dæma undanúrslitaleikinn gegn Dönum í Boxen.

„Það þarf allt að vera fullkomið á móti svona liði eins og Danmörku, en það var það ekki. Við brennum fjórum vítum, sem er ótrúlega mikið á móti svona sterku liði og þeir refsa í hvert skipti sem við skorum ekki. Það er það fyrsta sem kemur upp í hausinn en svo eru margar ákvarðanir hjá dómurunum sem ég á erfitt með að lifa með“ sagði Gísli í viðtali við Val Pál Eiríksson eftir leikinn í gær.

Vildi Gísli meina að íslenska liðið fengi oft á tíðum ekki að spila handbolta sökum ákvarðana dómara leiksins.

„Það var líka mín tilfinning að þær ákvarðanir hafi farið þeirra megin í dag. Það svíður auðvitað mikið því mér fannst við verðskulda meira.“

Gísli var á sömu nótum í viðtali við TV 2 í Danmörku en danski miðillinn hefur deilt fréttinni á samfélagsmiðlum og þar standa Danir ekki á sínum skoðunum.

„Sárir taparar,“ skrifar einn og segir íslenska viðhorfið hafa skinið í gegn allan leikinn. Þegar að vel hafi gengið lék allt í lyndi en um leið og liðið missti tökin hafi dómaranum verið kennt um.

„Danirnir hefðu auðveldlega getað unnið með 5-6 mörkum ef þeir hefðu lagt meiri þunga með sóknarleik sínum síðustu 3-4 mínúturnar.“

Aðrir eru á því að Strákarnir okkar hafi sloppið vel frá verkefninu miðað við hörkuna sem þeir sýndu í leiknum.

„Haltu kjafti Ísland og reynið að spila án þess að hjóla í andstæðinginn...Það sem þið sýnduð í gær er skandall fyrir handboltann.“