Svartfellingar hjálpuðu alls ekki Fær­eyingum

Færeyjar hefðu komist áfram bæði með sigri Svartfellinga á Svisslendingum og með jafntefli en svissneska liðið vann öruggan sautján marka sigur.

Sviss vann leikinn 43-26 eftir að hafa verið 22-16 yfir í hálfleik og á svissneska liðið því enn möguleika á sæti í milliriðlinum.

Liðið þarf að treysta á að Slóvenar vinni Færeyinga. Færeyjar og Sviss yrðu þá jöfn að stigum og jöfn innbyrðis en Sviss færi áfram á heildarmarkatölu í riðlinum.

Eitt stig úr leiknum myndi hins vegar tryggja færeyska liðinu sæti í milliriðlinum.

Norður-Makedónía á enn smá von um sæti í milliriðli eftir eins marks sigur á Rúmeníu, 24-23. Liðið er með þrjú stig eða jafnmörg og Portúgal en eins og er er liðið með sautján mörkum verri markatölu. Danir gætu tryggt Norður-Makedóníu áfram með átján marka sigri á Portúgal á eftir. Það er ekki mjög líklegt en möguleiki.

Makedóníumenn voru fimm mörkum yfir um tíma í leiknum og fjórum mörkum yfir í hálfleik, 13-9, en gáfu eftir í seinni hálfleiknum og þar með varð þessi litla von enn veikari.

Að lokum mættust Ítalía og Pólland í okkar riðli sem var aðeins barátta um þriðja sætið í riðlinum því hvorugt liðið átti möguleika á því að komast áfram. Ítalir voru skrefinu á undan nær allan leikinn og Simone Mengon tryggði liðinu að lokum 29-28 sigur á lokasekúndunum. Pólverjar fengu lokasókn leiksins en tókst ekki að jafna metin og enda því í síðasta sæti riðilsins. Þetta var fyrsti sigur Ítala í úrslitakeppni EM síðan 1998.