Risa­leikir í undanúr­slitum bikarsins

Boðað verður til bikarveislu í Smáranum 3.-8. febrúar, þar sem úrslitin ráðast í bikarkeppnum karla og kvenna sem og í yngri flokkum.

Dregið var í undanúrslit karla og kvenna í dag og má sjá dráttinn hér að neðan.

Ríkjandi bikarmeistarar eru fallnir úr leik, bæði hjá körlunum og konunum, en Valsmenn og Njarðvíkurkonur stóðu uppi sem sigurvegarar á síðustu leiktíð.

Liðin sem börðust um Íslandsmeistaratitil karla á síðustu leiktíð, Stjarnan og Tindastóll, gætu mæst í bikarúrslitaleiknum í ár því Stjarnan dróst gegn Keflavík en Tindastóll gegn KR.

Tindastóll og Keflavík eru bæði með lið í undanúrslitum karla og kvenna, og eiga því möguleika á að vinna tvöfalt í bikarnum í ár.

Leikið verður í undanúrslitunum þriðjudaginn 3. febrúar og miðvikudaginn 4. febrúar, og hefst miðasala á leikina núna á miðvikudaginn. Úrslitaleikirnir verða svo laugardaginn 7. febrúar.