Besta sætið: Janus bestur á vellinum en verður að halda á­fram að koma út í plús

Janus skoraði átta mörk í leiknum í Kristianstad og var markahæstur á vellinum. Hann lét einnig til sín taka í vörninni.

„Janus var frábær og öðrum ólöstuðum besti maður vallarins. Auðvitað er þetta það sem maður vill sjá hjá honum. Hann er fyrsti maður inn af bekk og hann þarf að koma með framlag. Það er ekki nóg að koma þarna og vera þarna. Hann hefur svo sem alltaf gert það. Hann er frábær í handbolta,“ sagði Einar í Besta sætinu, hlaðvarpi íþróttadeildar Sýnar.

Hann vonast til að Janus haldi mistökunum í lágmarki á mótinu og hvetur hann til að halda áfram á sömu braut og gegn Ítalíu.

„Hann lítur rosalega vel út. Hættu bara tæknifeilunum. Þegar hann kom inn á held ég að hann hafi skorað eitt mark eða gefið eina stoðsendingu og svo kom hann með einhverja ömurlega sendingu. Boltinn var bara gripinn og þeir fóru upp og skoruðu,“ sagði Einar.

„Hann fer stundum aðeins fram úr sjálfum sér. Spiluðu aðeins einfaldar því þú ert svo góður að þú þarft ekki að gera þetta. Hann hlustar kannski ekki á þetta en frændi hans hlustar á þetta og hendir þessum skilaboðum á hann. Vertu aðeins passívari. Þú þarft ekki að djöflast svona mikið. Slakaðu aðeins á. Taktu það besta og skerðu burt þessi örsmáu atriði. Hann á það til að eiga fimm góð augnablik en fimm tapaða bolta eða eitthvað þannig. Maður er bara: Ekki núlla þig alltaf. Vertu í plús.“

Næsti leikur Íslands er gegn Póllandi klukkan 17:00 á morgun. Pólverjar töpuðu með átta marka mun fyrir Ungverjum í gær, 29-21.

Hlusta má á Besta sætið í spilaranum hér fyrir ofan eða hér fyrir neðan. Þáttinn má einnig nálgast á öllum helstu hlaðvarpsveitum.