Flytja á­höfn geimstöðvarinnar heim vegna veikinda

Ekki hefur verið greint frá því hver geimfaranna er veikur né hvað hrjáir hann. Aðeins hefur verið staðfest að veikindin tengist ekki verunni í geimstöðinni og að ekki sé um meiðsli að ræða.

Hætt var við fyrirhugaða geimgöngu tveggja bandarískra geimfara um borð í stöðinni vegna veikindanna í gær. Það eru þau Mike Fincke og Zena Cardman.

Jared Isaacman, forstjóri NASA, tilkynnti í gær að dvöl fjögurra manna teymisins í svonefndri Áhöfn-11 í geimstöðinni yrði stytt vegna veikindanna. Auk Cardman og Fincke eru Japananinn Kimiya Yui og Rússinn Oleg Platonov hluti af áhöfninni.

Annar bandarískur geimfari verður eftir í geimstöðinni ásamt tveimur Rússum en þeir komu saman í rússneskri Soyuz-geimferju í nóvember.

„Þetta er ekki neyðarflutningur. Við leyfum heilsu geimfaranna alltaf að njóta vafans,“ sagði embættismaður NASA um ákvörðunina.

James Polk, yfirlæknir NASA, segir að þetta sé í fyrsta skipti í sögu stofnunarinnar sem ákveðið hefur verið að stytta geimferð vegna veikinda.

Geimfararnir fjórir sem stefna nú heim komu með geimferju SpaceX til stöðvarinnar í ágúst og áttu að dvelja þar í sex mánuði að minnsta kosti.