KR bætir við sig Letta

Leimanis er 31 árs bakvörður og er 190 sentímetrar að hæð. Hann hefur leikið tólf landsleiki fyrir Letta og var í hópi liðsins í síðasta landsliðsglugga í nóvember. Hann kemur til KR frá liði VEF í Ríga sem spilar í sameiginlegri körfuboltadeild Lettlands og Eistlands.

Leimanis hefur farið víða við á ferlinum og spilað í grannríkjunum Eistlandi og Litáen, auk Grikklands, Spánar, Úkraínu, Belarús og Mexíkó.

Toms hittir annan Letta hjá KR, Linards Jaunzems, sem hefur verið lykilmaður frá því hann gekk í raðir Vesturbæinga haustið 2024.

„Virkilega spenntur að fá Toms inn í liðið okkar. Hann hefur spilað á góðu leveli og átt góðan feril í Evrópu þar sem mjög gott orð af honum kemur frá fyrrum þjálfurum hans. Hann kemur með gæði, reynslu og leiðtogahæfni í liðið sem mun nýtast okkur vel,“ er haft eftir Jakobi Erni Sigurðarsyni, þjálfara karlaliðs KR, í yfirlýsingu félagsins.

Fyrrum leikmaður Vals til kvennaliðsins

Leimanis er annar leikmaðurinn sem gengur í raðir KR á nýju ári. Í gær var tilkynnt um komu hinnar bandarísk-frönsku Jiselle Thomas í raðir kvennaliðs félagsins.

Jiselle kemur til KR frá Celta Zorka í B-deild Spánar en hún lék með Val í Bónus-deild kvenna í fyrra. Hjá Val skoraði hún 17 stig að meðaltali í leik, tók fimm fráköst og gaf fimmstoðsendingar að meðaltali. Hún er 26 ára gamall bakvörður.

„Jiselle er fjölhæfur vængbakvörður sem er gríðarlega góð viðbót inn í okkar hóp. Hún kemur til með að styrkja okkar breidd fyrir seinni hluta tímabilsins. Hún hefur reynslu af deildinni sem er alltaf plús og við hlökkum til að vinna með henni eftir áramót,“ segir Daníel Andri Halldórsson, þjálfari kvennaliðs KR, um liðsstyrkinn.