Halda aðra tón­leika á Ís­landi fyrir þá sem misstu af

Jökull og Georg Leite, betur þekktur sem Goggi á Kalda, kíktu á Bylgjuna og ræddu þar við Ívar Guðmundsson um góðgerðasamkomuna Rauðu Jólin sem þeir verða með í Hlégarði 11. desember næstkomandi.

Kaleo héldu gríðarvinsæla stórtónleika í Vaglaskógi í sumar, sína fyrstu tónleika á Íslandi í áratug og seldust miðarnir upp á nokkrum mínútum. Ívar gat því ekki annað en spurt hvort það yrðu aðrir tónleikar á næsta ári. 

„Það voru færri sem komust að en vildu,“ segir Jökull um tónleikana í sumar. „Við erum að stefna á að vera með aðra tónleika á Íslandi á næsta ári. Meira má ég held ég ekki segja í bili en þetta er spennandi.“

Von er á tilkynningu um tónleikana eftir helgi að sögn Jökuls. Hér að neðan er hægt að hlusta á viðtalið við Jökul og Georg í heild sinni.