Al­var­legt um­ferðar­slys á Suður­strandar­vegi

Eyþór Rúnar Þórarinsson, slökkviliðsstjóri Brunavarna Suðurnesja, staðfestir þetta í samtali við fréttastofu. Hann segir að bíll hafi þar oltið. Samkvæmt tilkynningu frá lögreglunni á Suðurnesjum barst tilkynning um slysið klukkan 8:24 í morgun.

„Fjölmennt lið viðbragðsaðila frá lögreglunni á Suðurnesjum, Brunavörnum Suðurnesja og Slökkviliði Grindavíkur fóru á vettvang. Ljóst var á vettvangi að um bílveltu var að ræða og tveir einstaklingar alvarlega slasaðir. Slasaðir voru fluttir með sjúkrabifreið til móts við þyrlu Landhelgisgæslunnar sem er að flytja þá á sjúkrahús.

Unnið er að vettvangsrannsókn í samstarfi við tæknideild lögreglunnar á höfuðborgarsvæðinu. Frekari upplýsingar verða ekki veittar að svo stöddu,“ segir í tilkynningu lögreglu.

Eyþór segir aðstæður á vettvangi erfiðar og mikil hálka sé á svæðinu.

Varðstjóri hjá Brunavörnum Suðurnesja segir í samtali við fréttastofu á tólfta tímanum að hvorugir hafi verið í bílbeltum og hafi þeir báðir kastast út úr bílnum. Annar mannanna festist síðan undir farartækinu.

Samkvæmt upplýsingum á vef Vegagerðarinnar er Suðurstrandarvegur á milli Grindavíkur og gatnamóta að Krýsuvíkurvegi lokaðir vegna slyssins.

Þyrlusveit Landhelgisgæslunnar var kölluð til aðstoðar að beiðni lögreglunnar. Sveitin flaug til móts við sjúkrabíl og lenti á Krýsuvíkurvegi þaðan sem hún kemur til með að flytja annað hvort einn eða tvo slasaða með þyrlu á Landspítalann í Reykjavík samkvæmt upplýsingum frá Landhelgisgæslunni. 

Fréttin hefur verið uppfærð.