Ráð­gátan með dular­fulla peninga­seðilinn í leik Ís­lands leyst

Þýskaland sigraði Ísland, 32-25, í upphafsleik HM 2025 á miðvikudaginn. Leikurinn fór fram í Porsche-Arena í Stuttgart eins og aðrir leikir í C-riðli mótsins.

Athygli vakti þegar peningaseðill féll á gólfið á meðan leik Þjóðverja og Íslendinga stóð.

TV 2 í Danmörku leitaði skýringa hjá Alþjóða handknattleikssambandinu á þessum dularfulla seðli.

Samkvæmt upplýsingum frá IHF var ekki um raunverulegan peningaseðil að ræða heldur eins konar leikmun frá tónleikum þýska rapparans Dardan í Porsche-Arena. 

Seðlarnir voru notaðir sem eins konar konfettí á tónleikum hans.

Einn af seðlunum festist uppi í rjáfri í Porsche-Arena en rataði síðan alla leið niður á gólf í leik Þýskalands og Íslands. Að sögn IHF tengist seðillinn heimsmeistaramótinu ekki á neinn hátt og er aðeins leikmunur sem varð eftir í höllinni eftir tónleika Dardan.

Þjóðverjar fylgdu sigrinum á Íslendingum eftir með því að rúlla yfir Úrúgvæa í gær, 38-12. Með sigrinum tryggði Þýskaland sér sæti í milliriðli.

Íslendingar fylgja Þjóðverjum og Serbum í milliriðla svo lengi sem þeir tapa ekki gegn Úrúgvæum í lokaleik sínum í C-riðli á morgun.