„Mig langar mjög mikið að gráta“

„Mig langar mjög mikið að gráta. Þetta er ótrúlega svekkjandi og við lögðum gjörsamlega allt í þetta,“ sagði Þórey í samtali við Ágúst Orra Arnarson eftir leikinn í Stuttgart í kvöld.

„Ég fékk tvö færi í lokin og klúðraði þeim báðum. Þetta er sárt. Ég á eftir að hugsa um þetta lengi. En það er bara áfram gakk. Maður er mannlegur og þetta gerist.“

Ísland átti undir högg að sækja lengi vel í leiknum í kvöld og lenti mest sjö mörkum undir, 24-17. En lokakaflinn var frábær hjá íslenska liðinu og það var grátlega nálægt því að næla sér í sitt fyrsta stig á mótinu.

„Ég er ótrúlega stolt af þessu liði. Við börðumst eins og ljón og gáfum þeim ekki neitt. Það er heiður að fá að vera partur af þessu liði,“ sagði Þórey.

„Við megum svo sannarlega vera stoltar af okkar frammistöðu. Hver hefði trúað því að við myndum bara tapa með einu marki á móti Serbíu og vera í dauðafæri á að vinna þennan leik? Þetta var virkilega vel gert.“

Viðtalið við Þóreyju má sjá í spilaranum hér fyrir ofan.