Úti er ævin­týri hjá Elínu Klöru en HM tekur við

Liðin höfðu gert 31-31 jafntefli í fyrri leiknum í Svíþjóð fyrir viku en í dag varð Sävehof að sætta sig við 39-30 tap, og þar með samtals 70-61 tap í einvíginu um sæti í riðlakeppni Evrópudeildarinnar.

Sävehof komst þó í 10-7 í dag en Viborg hafði náð forystunni fyrir lok fyrri hálfleiks og var 19-16 yfir í hléi. Viborg skoraði svo fyrstu fimm mörkin í seinni hálfleik og þar með var ekki lengur spurning um hvernig færi.

Elín Klara var þriðja markahæst hjá Sävehof í dag með fjögur mörk.

Næsta verkefni hennar er af stærri gerðinni því nú tekur við sjálft heimsmeistaramótið með íslenska landsliðinu, þar sem fyrsti leikur er við Þýskaland eftir ellefu daga.

Í sænsku úrvalsdeildinni, sem Sävehof spilar einnig í, var annað Íslendingalið á ferðinni. Berta Rut Harðardóttir skoraði þrjú mörk í 36-29 tapi Kristianstad gegn Höörs á útivelli.