Nýtt fyrir­tæki í Grinda­vík með 24 starfs­menn

David Leifsson, sem er hálfur dani og hálfur Íslendingur stofnaði fyrirtækið fyrir nokkrum mánuðum og er nú þegar komin með tuttugu og fjóra starfsmenn og það er meira en nóg að gera í 3.300 fermetra húsnæði fyrirtæksins við Hafnargötu enda segir hann framtíð atvinnulífsins í Grindavík bjarta þrátt fyrir allt og allt.

„Við einbeitum okkur aðallega að fiskeldis starfsemi og byggjum fiskeldisstöðvar. Við smíðum lagnakerfi, útvegum efni, lagnir, dælur og brunna auk annars búnaðar.sem eldisstöðvar þarfnast. Einnig slöngur og slíkan búnað,” segir David.

Og David er mjög ánægður með að hafa fyrirtækið í Grindavík.

„Ég kann vel við mig og þetta er góður staður. Við fluttum hingað fyrir þremur mánuðum. Hér er kyrrlátt og friðsælt og hér er gott fólk,” bætir David við.

Hjá fyrirtækinu vinna bæði erlendir og íslenskir starfsmenn eins og Aurel, sem er frá Rúmeníu.

„Þetta er fínn og rólegur bær. Hann hefur upp á margt að bjóða. Vonandi mun brátt fjölga hér í bænum", segir hann.

Aurel er hæstánægður með það að búa í Grindavík.

„Já, þetta er allt að koma, mörg fyrirtæki eru að hefja starfsemi hér neðar í götunni, það er er jákvæð þróun,” segir hann.

Heimasíða fyrirtækisins