Mamma og pabbi í stúkunni þegar Emelía skoraði þrennuna í bikarnum

Emelía hefur skorað í tveimur leikjum Köge í röð eftir að hafa komið inn á sem varamaður í þeim báðum.

Hún kom fyrst inn á í leik á móti Kolding í dönsku deildinni. Henni var skipt inn á 59. mínútu leiksins og skoraði tólf mínútum síðar þegar hún kom Köge í 5-1. Sigurinn sá til þess að Köge er með sjö stiga forystu á toppi dönsku deildarinnar.

Aðeins nokkrum dögum síðar var komið að bikarleik á móti FC Kaupmannahöfn. Að þessu sinni kom Emelía inn á í hálfleik þegar hún leysti af stórstjörnuna Nadiu Nadim.

Það var ekki að sökum að spyrja því íslenski framherjinn skoraði þrennu í seinni hálfleik og mörkin hennar komu á 54., 74. og 80. mínútu.

Eitt markanna skoraði hún af örstuttu færi en eitt skoraði hún með geggjuðu langskoti yfir markvörðinn langt fyrir utan teiginn.

Emelía hélt upp á draumakvöld sitt á samfélagsmiðlunum Instagram og sýndi myndir frá leiknum.

Þar má meðal annars sjá hana faðma eldri systur sína Magneu við hlið foreldra þeirra, Laufeyjar Kristjánsdóttur og Óskars Hrafns Þorvaldssonar, sem voru í stúkunni og sá dóttur sína skora þrennu.

Tveir leikir, 76 mínútur og fjögur mörk. Gaman að sjá Emelíu blómstra eftir erfiða tíma.