„Ha, átti ég metið?“

Bríet Sif skoraði einn þrist í sigurleik Keflavíkur á Króknum sem var hennar 455. í efstu deild. Með því jafnaði hún met Pálínu Gunnlaugsdóttur sem hafði áður tekið metið af Birnu Valgarðsdóttur.

Pálína var einmitt sérfræðingur í Bónus Körfuboltakvöldi þegar fjallað var um leik Keflavíkurliðsins en hún vissi ekkert um að hún ætti sjálf metið.

„Það var samt einn merkilegur þristur sem kom í þessum leik í gær. Bríet Hinriksdóttir setti þennan þrist hér,“ sagði Ólöf Helga Pálsdóttir og sýndi þristinn. „Þarna var hún að jafna met í flestum þristum, Pálína,“ sagði Ólöf og um leið kom upp topplistinn þar sem Pálína var jöfn Bríeti í efsta sætinu.

„Ha, átti ég metið,“ sagði Pálina hissa. „Ég þarf að rífa fram skóna,“ sagði Pálina létt.

Hallveig Jónsdóttir, sem var hinn sérfræðingur þáttarins, var einnig á listanum eða í sjötta sætinu með 406 þrista.

Það má sjá þessa skemmtilegu uppákomu í þættinum hér fyrir ofan.