Leigu­bíl­stjóri grunaður um stór­fellda líkams­á­rás rekinn

„Stjórn Hreyfils harmar það alvarlega atvik sem átti sér stað um helgina þar sem farþegi varð fyrir ofbeldi af hálfu leigubifreiðarstjóra sem ók undir merkjum fyrirtækisins,“ segir í yfirlýsingu frá stjórn Hreyfils í kjölfar fyrirspurnar blaðamanns.

Leigubílstjórinn var handtekinn aðfaranótt sunnudags fyrir stórfellda líkamsárás en samkvæmt heimildum fréttastofu er maðurinn grunaður um að hafa rifið í konuna, hent henni í jörðina og gengið í skrokk á henni.

„Um leið og atvikið komst upp var viðkomandi bílstjóri umsvifalaust rekinn af Hreyfli og brottrekstur tilkynntur til Samgöngustofu.“

Lögð er áhersla á að stjórnin telji öryggi og traust farþega afar mikilvægt. Unnið verði markvisst að því að tryggja örugga og ábyrga þjónustu.

„Í kjölfar þessa atviks mun stjórn fara í heildstæða endurskoðun á verklagi, innra eftirliti og fræðslu til bílstjóra til að tryggja áframhaldandi öryggi og fagmennsku í þjónustu félagsins,“ segir stjórnin.

Lýsingar á árásinni hafa verið birtar á samfélagsmiðlum og segir þar að um leigubílstjóra af erlendum uppruna sé að ræða. Samkvæmt heimildum fréttastofu er árásarmaðurinn íslenskur.