Banda­maður Trumps skotinn til bana á fjöl­mennum við­burði

Tilefni þess að Kirk var skotinn af færi liggur ekki fyrir enn.

Kirk, sem var 31 árs gamall og tveggja barna faðir, hafði verið dyggur stuðningsmaður Trumps og MAGA-hreyfingarinnar og hefur af mörgum verið bendlaður við velgengni Trumps í að ná til ungs fólks í forsetakosningunum í fyrra. Þá var Kirk náinn vinur Trumps yngri, sonar forsetans, og annarra áhrifamanna innan Repúblikanaflokksins.

Hann stofnaði Turning Point USA, sem er einskonar ungliðahreyfing íhaldsmanna í Bandaríkjunum.

Sjá einnig: Greiddu unglingum til að dreifa áróðri til stuðnings Trump

Kirk var að ræða við nemendur Utah Valley háskólans þegar hann var skotinn í hálsinn en skotárásin var fönguð á myndband af nemendum. Kirk var að ljúka við að svara spurningu frá áhorfanda um skotárásir í Bandaríkjunum.

Hann hafði verið spurður hvort hann vissi hve margar fjöldaskotárásir hafi verið framdar í Bandaríkjunum á undanförnum tíu árum og spurði á móti hvort það ætti að telja árásir sem tengjast skipulagðri glæpastarfsemi með. Strax í kjölfarið var hann skotinn en kúlan hæfði hann í hálsinn.

Vert er að vara lesendur við myndböndunum hér að neðan en það sýnir árásina.

Einungis einu skoti var hleypt af og segja embættismenn að Kirk hafi verið eina fórnarlambið. Markmiðið hafi verið að myrða hann. Um þrjú þúsund manns voru á viðburðinum þegar Kirk var skotinn. Þar voru einnig sex lögregluþjónar auk öryggisvarða sem fylgdu Kirk eftir.

Skömmu eftir morðið fóru myndbönd af handtöku eldri manns á skólalóðinni í dreifingu og var hann sagður vera árásarmaðurinn. Lögreglan staðfesti í kjölfarið að sá hefði ekki verið árásarmaðurinn en hann var þrátt fyrir það ákærður fyrir að standa í vegi réttvísinnar.

Önnur myndbönd sem hafa verið í dreifingu sýndu mann á þaki húss á skólalóðinni en talið er að skotið hafi komið frá því húsi. Eitt myndband var tekið skömmu áður en skotinu var hleypt af og sá sem tók það sagðist hafa séð mann leggjast niður á þakinu.

Annað var tekið skömmu eftir skotið og má þar sjá glitta í mann hlaupa upp á þakinu. Myndböndin má finna í vaktinni hér að neðan (21:45)

Renna má yfir vaktina hér að neðan en þar var fylgst með helstu vendingum í kvöld. Áfram verður fylgst með málinu á Vísi í fyrramálið.