„Auð­vitað er ég svekktur“

Craig Pedersen, þjálfari íslenska karlalandsliðsins í körfubolta, var nokkuð sáttur með leik sinna manna gegn ofurstjörnunni Luka Dončić og samlöndum hans í slóvenska landsliðinu.

„Fannst við spila vel gegn virkilega góðu og reynslumiklu liði. Auðvitað er ég svekktur að við höfum ekki verið örlítið nær (sigrinum) en að sama skapi finnst mér magnað að enn á ný getum við staðið í svona góðu liði.“

Hvað vantaði að mati Craig?

„Smá bit hér og þar. Nokkrir tapaðir boltar sem við töpum venjulega ekki. Svoleiðis hlutir telja gegn öflugu liði Slóveníu sem hefur leikmann sem getur stýrt leiknum og gert aðra leikmenn betri. Hann gerði það í dag.“

„Auðvitað eru nokkur atriði sem við erum ekki sammála um en við erum að reyna einbeita okkur að því sem við getum haft áhrif á. Fannst leikmennirnir gera vel í að halda einbeitingu í dag svo það er í raun ekkert að segja um dómarana,“ sagði Craig að endingu.