Ein­kunnir strákanna á móti Belgíu: Tryggvi frá­bær en okkur vantaði al­vöru töffara í lokin

Eftir svekkjandi tap á móti Ísrael í fyrsta leik voru strákarnir staðráðnir í að landa fyrsta sigri Íslands í úrslitakeppni EM. Þeir voru líka svo svakalega nálægt því enda leiddi íslenska liðið í næstum því 32 af mínútunum fjörutíu.

Íslenska liðið var sjö stigum yfir þegar Tryggvi Snær Hlinason tróð boltanum í körfuna þegar fimm mínútur voru eftir. Þá fór allt í baklás.

Belgarnir unnu síðustu fimm mínútur leiksins. 12-2 og tryggðu sér sigurinn.

Það voru margt mjög jákvætt í leik íslenska liðsins en það voru þessi litlu smáatriði sem féllu ekki með íslenska liðinu.

Tryggvi Snær hefur átt tvo mjög góða leiki á mótinu og Martin Hermannsson kom sterkur til baka eftir vonbrigðin í fyrsta leiknum.

Það voru hins vegar þessar örlagaríku lokamínútur sem eyðilögðu daginn fyrir íslenska liðið. Liðið vantað alvöru töffara til að klára dæmið í sókninni því það voru næg tækifæri til að skora körfu sem íslenska liðið vantaði svo svakalega þegar ekkert gekk.

Frammistöðumat íslensku leikmannanna í leiknum

Byrjunarliðið:

Elvar Már Friðriksson, bakvörður 3

13 stig á 31:41 mínútu (PlúsMínus: -8 Framlag: 6)

Mótorinn í sóknarleik íslenska liðsins. Alltaf að ráðast á vörnina og reyna að koma einhverju í gang. Fékk slæmt högg í fyrri hálfleik sem háði honum aðeins en hann harkaði af sér. Kvartaði mikið í dómurunum enda var hann að fá lítið. Sýndi ítrekað áræðni sína og útsjónarsemi en meiðslin háðu honum augljóslega í lokin þegar við þurftum eitthvað gott á sóknarhelmingnum. Hitti ekki vel í þessum leik.

Hilmar Smári Henningsson, bakvörður 2

2 stig á 13:55 mínútum (PlúsMínus: -14 Framlag: 0)

Hent óvænt inn í byrjunarliðið. Byrjaði leikinn á því að keyra á körfuna og skora laglega körfu. Hitti ekki vel eftir það en sýndi að hann þorir að taka af skarið. Dýrmæt reynsla fyrir strákinn og hann hefur stimplað sig inn í liðið.

Martin Hermannsson, bakvörður 3

12 stig og 8 stoðsendingar á 29:23 mínútum (PlúsMínus: -8 Framlag: 14)

Núna þekkjum við hann. Heppnin var kannski ekki alveg með honum í liði en hugarfarið frábært. Bjó mikið til fyrir sig og aðra í liðinu. Byrjaði grimmur en kannski of grimmur því hann var kominn með tvær villur eftir aðeins tæpar tvær mínútur. Fékk á sig afar svekkjandi ruðningsdóm á úrslitastund þegar hans tími átti að vera runninn upp.

Kristinn Pálsson, framherji  3

6 stig og 8 fráköst á 30:23 mínútum (PlúsMínus: -15 Framlag: 8)

Staðráðinn að grípa tækifærið þegar hann kom inn í byrjunarliðið. Ekkert fallegra og mikilvægra fyrir liðið þegar hann smellir niður þristunum sínum. Lét vel finna sér í vörninni og tók oftast góðar og skynsamar ákvarðanir. Fórnaði sér fyrir málstaðinn og fékk að minnsta kosti þrjú kjaftshögg í leiknum. Frákastaði lengstum vel en hitti ekki vel í seinni hálfleik.

Tryggvi Snær Hlinason, miðherji 5

20 stig, 10 fráköst og 5 varin á 39:02 mínútum (PlúsMínus: -2 Framlag: 32)

Aftur besti maður íslenska liðsins. Átti margar troðslur, fullt af fráköstum og varði líka fimm skot frá Belgunum. Endaði með yfir þrjátíu í framlagi. Byrjaði leikinn á troðslu og gaf tóninn. Átti frábæran leik og réði ríkjum undir körfunni. Belgarnir skoruðu aðeins tíu stig inn í teig í fyrri hálfleik sem segir sína sögu. Belgarnir reyndu allan leikinn að finna lausnir á því að spila á móti Tryggva. Það gekk betur í lokin en þar kom líka inn í að Tryggvi fékk ekki mikla hvíld í þessum leik.

Komu inn af bekknum

Ægir Þór Steinarsson, bakvörður 3

1 stig á 17:15 mínútum (PlúsMínus: 0 Framlag: 2)

Kom inn í vígahug i vörnina og lét Belgana ekki í friði með kappi sínu og festu. Gerir auðvitað ekki mikið sóknarlega en færir orkustigið alltaf upp á næsta stig.

Jón Axel Guðmundsson, framherji 4

7 stig á 24:05 mínútum (PlúsMínus: +10 Framlag: 10)

Missti sætið í byrjunarliðinu en kom inn og skilaði mikilvægum mínum í hlutverki fjarkans í vörninni. Það gekk mikið upp á hjá honum sóknarlega framan af en mikilvægið í varnarleiknum sést vel á því að íslenska liðið var plús með hann inn á gólfinu. Skoraði mikilvægan þrist þegar lítið gekk í þriðja leikhluta og það kveikti líka heldur betur á sóknarmanninum Jóni.

Kári Jónsson, bakvörður 3

2 stig á 2:14 mínútum (PlúsMínus: +2 Framlag:3)

Kom óvænt inn strax í fyrsta leikhluta vegna villuvandræða Martins og var algjörlega óhræddur þegar hann skoraði góða körfu.



Styrmir Snær Þrastarson, framherji 2

1 stig á 11:40 mínútum (PlúsMínus: 0 Framlag: 1)

Var svolítið ragur og óákveðinn í sóknarleiknum en fær mínútur af því að hann spilar hörkuvörn og er oftast skynsamur í sókn.

Craig Pedersen, þjálfari 3

Leikurinn var vel upp lagður og allt gekk vel upp í 35 mínútur. Það var allt til alls til að klára fyrsta sigur Íslands á EM og svekkelsið er því afar mikið. Spurningin er hvar sökin lá í lokin þegar allt fór í baklás. Sóknarleikurinn fraus, Belgunum tókst að loka á Tryggva og bakverðirnir höfðu ekki burði til að búa eitthvað til þegar allt var undir.  Það voru tekin leikhlé en þessi eina eða tvær körfur sem liðið þurfti svo mikið á að halda á lokasprettinum litu aldrei dagsins ljóst. Nú þarf að grafa djúpt og byggja upp liðið fyrir leik strax annað kvöld.