Tugir hjóla frá Siglu­firði til Dal­víkur í nýrri fjallahjólakeppni

Í tilkynningu kemur fram að hjólaleiðirnar liggi um grýtta stíga Eyjafjarðar og Vaðlaheiðar, frá Siglufirði yfir á Dalvík og Mývatnssveit til Húsavíkur. Þar kemur einnig fram að þó svo að keppnin sé haldin í fyrsta skipti í ár leggi keppendur leið sína frá Taívan, Bandaríkjunum og Evrópu og að sjálfsögðu frá Íslandi.

„The Rift MTB er einstakt tækifæri fyrir bæði innlenda og erlenda hjólamenn til að kynnast Íslandi á sinn eigin einstaka máta í fallegri náttúru,“ segir Dana Rún Hákonardóttir, markaðsstjóri Lauf Cycles og skipuleggjandi keppninnar.

„Eftir að hafa byggt upp The Rift sem alþjóðlegt vörumerki í heimi malarhjólreiða langaði okkur til að taka fjallahjólin á næsta stig“.

The Rift fór fram á Hvolsvelli 19. júlí og var það í sjötta skiptið sem keppnin fór fram. Alls tóku þúsund hjólreiðamenn þátt í keppninni. Ingvar Ómarsson og Hafdís Sigurðardóttir hlutu Íslandsmeistaratitilinn í ár en fyrsta sinn var The Rift líka með Íslandsmeistarakeppnina í gravel-hjólreiðum.

Hin Þýska Rosa Maria Klöser vann keppnina í kvennaflokki og danski Magnus Bak Klaris í karlaflokki.

Dana segir að um þrjú þúsund manns hafi sótt keppnina á Hvolsvelli í sumar og að um 90 prósent keppenda hafi komið erlendis frá. Keppendur hjóluðu annað hvort 140 eða 200 kílómetra við Heklurætur.