„Ég er mjög þreyttur“

Stjarnan átti í miklum vandræðum í fyrri hálfleik leiks kvöldsins en óx ásmegin eftir því sem leið á þann síðari.

„Mér fannst þeir betra liðið í fyrri hálfleik en í seinni hálfleik vorum við sterkari. Sérstaklega eftir að við fengum á okkur markið, þá fundum við rytmann. Því miður náðum við ekki í annað markið til að klára þetta. Mér fannst við eiga betri færi í lok leiks en það gekk ekki upp í dag,“ segir Caulker í samtali við Ágúst Orra Arnarson á Sýn Sport.

En hvað var það þá sem þurfti að laga í hléinu?

„Bilið á milli öftustu fjögurra og þeirra fremstu var of mikið. Það var starfið mitt og varnarlínunnar að ýta liðinu ofar á völlinn. Mér fannst við gera það en eins og ég segi, við sköpuðum helling af færum en boltinn vildi bara ekki inn. Við skutum í stöng og slá, hefðum getað fengið tvö víti. Mér fannst við gera nóg til að vinna en við vitum að það þarf að gera betur en í fyrri hálfleiknum,“ segir Caulker.

Um var að ræða fyrsta leik enska Síerra Leóne-mannsins hér á landi eftir skiptin til Stjörnunnar í síðasta mánuði. Hann hefur ekki spilað fótboltaleik síðan í vor og lagðist niður vegna stífleika undir lok leiks.

„Ég er mjög þreyttur, ef ég á að vera hreinskilinn. Það erfiða við að koma á miðju tímabili er að ég fæ enga æfingaleiki. Ég var ekki viss um hvort ég myndi endast í 60, 70 eða 80 mínútur. Ég kláraði 90, það er gott að koma því í tankinn en ég þarf að hvíla mig fyrir sunnudaginn kemur,“ segir Caulker.