„Skemmti­legra þegar vel gengur“

Agla María var heilt yfir sátt með frammistöðu liðsins í kvöld.

„Ég er mjög ánægð með mína frammistöðu í kvöld og sérstaklega eftir pásuna, mér finnst við sem lið vera að halda góðum dampi, komum inn í hvern leik og skilum góðri frammistöðu sem er mjög jákvætt.“

Lið Breiðabliks er búið að vinna sjö leiki í röð í öllum keppnum. Aðspurð tekur Agla María undir að það sé skemmtilegra þegar vel gengur: 

„Klárt mál, þetta var samt sem áður lykilleikur fannst mér, það getur verið erfitt að koma á Hlíðarenda og þrátt fyrir að þær séu að ströggla þá vorum við alveg klárar á því að þetta gæti orðið erfiður leikur en við gerðum okkur auðvelt fyrir með því að skora snemma, það var mjög gott.“

Breiðablik er á toppi Bestu deildar kvenna með 31 stig að loknum 12 leikjum. Þar á eftir koma FH og Þróttur Reykjavík með 25 stig hvort. Bæði lið eiga leik til góða á Blika.