Mario fer ekki á EM – fimm dottnir úr hópi Íslands

Valur Páll Eiríksson skrifar 29. júlí 2025 14:07

Mario Matasovic er í Króatíu og fer ekki á EM. Vísir/Hulda Margrét

Æfingahópur karlalandsliðsins í körfubolta hefur verið skorinn niður um fimm leikmenn frá þeim hópi sem opinberaður var í síðustu viku. 17 leikmenn eru eftir í hópnum.

Fjölmiðlafólk mætti á æfingu landsliðsins í Ásgarði í Garðabæ í dag og mátti sjá að þónokkrir úr hópi Íslands voru ekki á meðal leikmanna á æfingunni.

Þeir Bjarni Guðmann Jónsson, Friðrik Leó Curtis, Mario Matasovic, Ólafur Ólafsson og Sigurður Pétursson voru ekki á æfingu dagsins og munu því ekki fara á komandi Evrópumót sem hefst eftir tæpan mánuð.

Friðrik Leó hélt vestur um haf í skóla og var ákveðið að hans hagsmunum væri betur borgið þar en á EM. Mario Matasovic var þá í einhverjum vandræðum varðandi íslenskt vegabréf, en hann var á meðal þeirra sem fékk ríkisborgararétt í sumar. Hann er staddur í hinu heimalandinu sínu, Króatíu, og hefur ekki æft með íslenska liðinu.

Hinir þrír hafa verið skornir úr hópnum sem verður svo skorinn enn frekar niður eftir því sem nær dregur móti.

14 leikmenn taka þátt á æfingamóti með íslenska liðinu á Ítalíu í byrjun ágúst og aðeins tólf leikmenn fara á EM.

Fimm leikir fram að móti

1.-4. ágúst fer liðið til Ítalíu og tekur þátt í móti ásamt heimamönnum, Pólverjum og Senegölum. Ísland mætir Ítalíu í fyrri leik ferðarinnar og fer það eftir úrslitum úr leik Pólverja og Senegala hvoru liðinu Ísland mætir í seinni leiknum.

12.-16. ágúst fer liðið til Portúgals og mætir þar liðum Portúgals og Svíþjóðar.

Þann 22. ágúst mæta okkar menn svo Litáen í lokaleiknum fyrir EuroBasket og verður leikið í Litáen. Þaðan verður svo farið beint til Katowice í Póllandi á EuroBasket en þangað verður liðið að vera mætt 25. ágúst.

Fyrsti leikur á EM er við Ísrael þann 28. ágúst.

Sem stendur lítur hópur Íslands svona út: