Hamp­iðjan kaupir ástralskan kaðlaframleiðanda

Hampiðjan greinir frá í fréttatilkynningu að fyrirtækið hafi skrifað undir samning um kaup á International Rope Braid (IRB) á Gullströndinni sunnan Brisbane á austurströnd Ástralíu, og því er fyrirtækið skammt höfuðstöðvum Hampidjan Australia.

Hampiðjan lauk í ár kaupum á indverskum kaðlaframleiðanda upp á þrjá milljarða króna og vinn­ur nú að kaup­um á landi í Indlandi til frek­ari upp­bygg­ing­ar.

IRB var stofnað 2005 af hjónunum Dave og Suzy Allen, sem munu samkvæmt tilkynningunni selja allan sinn hlut en styðja við yfirtökuferlið næstu mánuðina.

Gert er ráð fyrir að rekstur IRB komi inn í samstæðureikning Hampiðjunnar frá 1. ágúst. Fyrirtækið hefur sérhæft sig í að flétta kápur utan um ýmsar gerðir af ofurtógum og framleiðslu á slíkum tógum fyrir margs konar viðskiptavini. En mest er salan tengd seglskútum og stærri vélbátum sem notaðir eru til skemmtisiglinga ásamt sölu til fyrirtækja í námuvinnslu, fiskeldi, fiskveiðum og öðrum iðnaði.

Velta IRB hefur verið um 1,7 milljónir evra á ári (241 m.kr.) síðustu ár og rekstrarhagnaður fyrir skatta og vexti  var rúmlega 0,4 milljóni evra (56 m.kr.) á síðasta rekstrarári. Starfsmenn eru 16 talsins, samkvæmt tilkynningunni.

Haft er efir Suzy og Dave Allan í tilkynningunni: „Við erum himinlifandi með að skilja fyrirtækið okkar og sérstaklega teymið okkar, sem er okkur mjög mikilvægt, eftir í svona hæfum höndum, vitandi að IRB í höndum Hampiðjunnar mun halda áfram að blómstra.”