Fagna átta­tíu ára af­mæli milli­landa­flugs Ís­lendinga

Í frétt Glasgow-flugvallar kemur fram að Icelandair og flugvöllurinn hafi til hátíðarbirgða staðið fyrir ýmsum uppákomum. Farþegum hafi verið boðið upp á köku og þeir leystir út með gjöf. Þá bjóði Icelandair upp á sérstakan 80 punda afslátt af Saga Premium-farmiðum.

Það var þann 11. júlí árið 1945 sem Catalina-flugbátur Flugfélags Íslands tók á loft frá Reykjavík, fyrsta farþegaflugvélin á leið í millilandsflug á vegum íslensks flugfélags. Áfangastaðurinn var Largs-flói vestur af Glasgow.

Fjórir Íslendingar skipuðu áhöfn flugbátsins. Flugstjóri var Jóhannes R. Snorrason og aðstoðarflugmaður Smári Karlsson. Sigurður Ingólfsson var flugvélstjóri og Jóhann Gíslason loftskeytamaður.

Farþegar voru fjórir, þar af þrír íslenskir heildsalar á leið til Bretlands í leit að nýjum viðskiptatækifærum, stór­kaup­menn­irn­ir Hans Þórðar­son, Jón Jó­hann­es­son og Jón Ein­ars­son, en fjórði farþeginn var séra Ró­bert Jack. Einnig voru tveir breskir hermenn með um borð að kröfu hernaðar­yf­ir­valda.

Flogið var í sjöþúsund feta hæð og tók flugið sex klukkustundir og fjórar mínútur. Til samanburðar nefnir Icelandair að flugferðin núna milli Keflavíkur og Glasgow taki um tvær og hálfa klukkustund.

Í lýsingu af flugferðinni segir að þegar flug­vél­in var lent hafi farþegar staðið upp og hrópað fer­falt húrra fyr­ir flug­mönn­un­um. Morg­un­inn hafi flug­vél­in snúið aft­ur til Íslands og lenti á Skerjaf­irðinum við Reykja­vík sex tímum síðar. Eng­ir farþegar hafi verið til Íslands.

Flug­stjór­inn, Jó­hann­es R. Snorra­son, sagði síðar frá: „Okk­ur var mjög vin­sam­lega tekið í Largs og fyr­ir­menn bæj­ar­ins buðu okk­ur til tedrykkju á fögr­um stað og spurðu margra spurn­inga um Flug­fé­lagið og þjóðina, sem hafði hafið milli­landa­flug, meðan þjóðir Evr­ópu voru enn að sleikja sár sín eft­ir ófriðinn“.

Icelandair-fólk hefur aðra ástæðu til að fagna þessa dagana. Í mánaðarlegu yfirliti flugtölfræðifyrirtækisins Cirium kemur fram að Icelandair hafi verið stundvísasta flugfélag Evrópu í júnímánuði. Danska flugfréttasíðan Check-in segir að Icelandair hafi þar með komið í veg fyrir að SAS fagnaði þeim sessi þriðja mánuðinn í röð.