Kerecis bjargaði lífi skallaarnar í tæka tíð fyrir fjórða júlí

Örninn hlaut nafnið Kere en hann fannst í almenningsgarði í Hayward í Wisconsin í ágúst síðastliðnum með illa sýkt svöðu sár og í mikilli undirþyngd. Sárið náði allan hringinn um annan fót arnarins. Með svo alvarlega sýkingu taldi Kimberly Ammann dýralæknir að það eina í stöðunni væri að lóga honum. Það var þá sem hún mundi eftir að hafa lært um húðígræðslur sem liður í dýralækninganámi sínu.

Eftir eftirgrennslan á netinu uppgötvaði hún Kerecis, lífæknifyrirtækið vestfirska sem sérhæfir sig í því að græða sár með fiskroði. Yfirleitt þó sár á mannfólki eins og gefur að skilja. Kerecis sendi henni búta af þurrkuðu þorskroði og með leiðbeiningum frá fyrirtækinu hófst Ammann handa.

Hún segir við Guardian að meðferðin hafi gengið vel. Tíu mánaðaendurhæfingaferli tók við.

„Eina ástæðan fyrir því að þetta virkaði er hvað hún var góður sjúklingur,“ hefur miðillinn eftir Kimberly Ammann dýralækni.

22. júní síðastliðinn var Kere svo sleppt aftur út í náttúruna. Ammann lýsti deginum sem tilfinningarússíbana. Um hundrað fylgdust með þegar Kere tók á loft á nýjan leik, laus við sár og sýkingar á fæti. Ammann segir að undirbúningur fyrir þjóðhátíðardagshátíðarhöld hafi verið í fullum gangi í bænum sem væri viðeigandi. Skallaörninn sé tákn um bandarískt frelsi.

„Ég er svo spennt fyrir hennar hönd. Hún ræður því hvert hún fer, við hvaða stöðuvatn hún situr, hvert hún ætlar að fara að veiða. Hún hefur frelsi til þess að taka þessar ákvarðanir núna. Og hvenær er það meira viðeigandi en á fjórða júlí?“ er haft eftir Ammann.