Cecilía og Svein­dís mynda gott grín­par: „Hún er létt­klikkuð“

Ólafur ræddi við Sýn á æfingasvæði íslenska landsliðsins í morgun áður en hann fór að segja markvörðum íslenska liðsins til á æfingu. Nú þurfa leikmenn að hrista af sér vonbrigðin eftir 1-0 tapið gegn Finnum og finna leiðir til að leggja Sviss að velli á sunnudaginn, þar sem mikið kemur til með að mæða á Cecilíu.

„Cecilía stóð sig mjög vel í gær. Hún var örugg í öllum sínum aðgerðum. Tók fyrirgjafir og varði þau skot sem hún þurfti að verja, og gat lítið gert við markinu miðað við það sem ég hef skoðað. Góð heildarframmistaða hjá henni,“ sagði Ólafur en viðtalið má sjá hér að neðan.

Cecilía var valin besti markvörður Ítalíu í vetur og ein af fimm efnilegustu leikmönnunum á EM að mati ESPN. Hún verður brátt 22 ára og gæti því átt eftir að verja mark Íslands næsta áratuginn og mun lengur en það, en hvað gerir hana svona góða:

„Hún er róleg og hefur mikla trú á sjálfri sér,“ segir Ólafur.

„Hún er róleg, yfirveguð, veit hvað hún getur og undirbýr sig vel. Allt markvarðateymið er búið að undirbúa sig vel fyrir leiki, við skoðum fyrirgjafir og vítaspyrnur og annað, og reynum að vera eins vel undirbúin og við getum,“ segir Ólafur sem er einnig ánægður með hugarfar Cecilíu.

„Hún er léttklikkuð, eins og við markmenn erum oft. Gaman að henni. Við markmenn erum miklir húmoristar. Hún og Sveindís mynda gott teymi saman í að hlæja og fíflast, en eru mjög einbeittar. Það má ekki gleyma að þó við séum á stórmóti þá má brosa og hafa gaman. Hópurinn, bæði liðið og allt staffið, er mjög einbeitt í því sem við erum að gera. Við undirbúum allt mjög vel,“ sagði Ólafur en vildi svo sem ekki blanda sér mikið í einhverja umræðu um að myndbandagerð á samfélagsmiðlum trufli leikmenn:

„Nei, en bara svo fólk viti það þá erum við hérna í langan tíma og það verður að vera gaman líka. Á sama tíma er mikil einbeiting í öllu sem við erum að gera.“

Eins og fyrr segir er Cecilía markvörður Inter og nú til frambúðar, eftir að félagið keypti hana frá Bayern München.

„Gott hjá henni. Frábært skref. Hún var valin besti markvörðurinn á Ítalíu og það er bara gott að hún sé að spila. En það má ekki gleyma að þær eru þrjár í þessu teymi hérna og bæði Fanney [Inga Birkisdóttir] og Telma [Ívarsdóttir] styðja hana út í eitt. Rosalega flottar með henni og við vinnum ótrúlega vel saman. Þær eru allar að spila erlendis núna, Fanney í Svíþjóð og Telma í Skotlandi, og það er bara geggjað fyrir markmannsþjálfarann.

Ég hef sagt við þær að ég myndi treysta hverri einustu þeirra til að spila hverja einustu mínútu á þessu móti. Þær geta allar spilað en okkar val er að láta Cessu spila núna,“ segir Ólafur.

Næsti leikur Íslands er á sunnudag gegn heimakonum og þann leik eins og aðra þarf Cecilía að undirbúa sérstaklega:

„Við skoðum bara horn, aukaspyrnur, fyrirgjafir og slíkt. Eins ef það er einhver vinstri fótar maður sem þarf að minna sérstaklega á. Við skoðum vítin mjög vel og hún er með merkingar á brúsanum sínum um hvar hver og einn leikmaður er líklegastur til að taka sín víti. Svo reynum við bara að undirbúa andlega þáttinn og hjálpumst öll að.“