Þekkir ekkert annað en pressu

Langri bið körfuboltaunnenda lýkur í kvöld er Bónus-deild karla fer af stað með fjórum leikjum.

„Undirbúningur hefur gengið vel og mér finnst við vera á fínum stað,“ segir Baldur. Höttur heimsækir Álftanesið í kvöld og heimamenn eru klárir í slaginn.

Álftanes er efst í flestum spám fyrir komandi tímabil og því spáð deildarmeistaratitlinum. Mikið hefur verið lagt í sölurnar í sumar og fjölmargir öflugir leikmenn bæst við liðið auk þjálfarans Baldurs sem þekkir það vel að fagna Íslandsmeistaratitlum.

Aðspurður um það hvort spárnar hafi áhrif segir Baldur:

„Spá er náttúrulega bara spá. Þegar ég var að þjálfa í fyrra þá man ég ekki einu sinni hvar mér var spáð eða mínu liði var spáð. Þetta er stemning og mikið í umræðunni þegar það móment er í gangi. En svo er þetta náttúrulega bara staðfesting á því að það hafa fleiri trú á því að við séum að gera góða hluti heldur en bara við sjálfir.“

En það fylgir því líka aukin pressa?

„Alltaf pressa. Ég bara man ekki eftir því að hafa ekki verið pressa. Þegar ég tek við ungur Þorlákshöfn, þá er engin trú á þér. Annað hvort nærðu árangri eða þú ert búinn í þessum bransa og svo ferðu á Krókinn í súperpressu og annaðhvort gerist eitthvað eða þú ert búinn á því,“ segir Baldur sem hóf feril sinn sem þjálfari Þórs í Þorlákshöfn og tók því næst við Tindastóli á Sauðárkróki. Þaðan fór hann til Þýskalands og svo til Stjörnunnar.

„Svo kemurðu með heim úr Þýskalandi í súperlið í Stjörnunni og það er pressa og núna ertu með gott lið á Álftanesi og það er pressa. Þetta er bara ekkert nýtt fyrir mér. Það er bara pressa ef þú ert þjálfari, að ná árangri og það er bara partur af starfinu. Hvar sem þú ert,“ segir Baldur.

Rennir blint í sjóinn

Iðulega eru gerðar töluverðar breytingar á körfuboltaliðum landsins milli tímabila. Inn koma erlendir leikmenn sem hafa ekki sýnt sig áður hér á landi og erfitt getur verið að rýna í hin og þessi lið.

Aðspurður um hvort menn renni blint í sjóinn í fyrstu leikjum tímabilsins segir Baldur.

„Já, fyrstu umferðirnar eru alltaf öðruvísi og svo líður á tímabilið og það kemur einhver meiri stöðugleiki í þetta. Það er náttúrulega bara þannig að fyrstu umferðirnar eru alltaf mjög opnar og fara í allar áttir. Allir leikmenn eru einhvern veginn með óskrifað blað og mjög spenntir fyrir að sýna sig og sanna. Þannig að fyrstu umferðirnar eru mjög óútreiknanlegar,“ segir Baldur.

Stemning á Álftanesi

Baldur býst þá við töluverðri stemningu á Álftanesi í kvöld þar sem eftirvæntingin er mikil fyrir nýju og spennandi liði.

„Það er bara hörkuspenna og samfélagið vill vinna fleiri körfuboltaleiki. Við ætlum að gera okkar besta til þess að gera það og á endanum er þetta náttúrulega bara frá degi til dags að leggja á þig og reyna að ná í sigra. Þannig að það er bara mikil spenna í samfélaginu og maður finnur það að það er mikill meðbyr hérna á þessu svæði með körfuboltanum og það er bara gaman að taka þátt í því,“ segir Baldur.

Leikur Álftaness og Hattar hefst klukkan 19:15 í kvöld og er einn fjögurra leikja í deildinni sem fara fram á þeim tíma. Allir leikirnir eru í beinni á rásum Sýnar Sport Ísland og þá má fylgjast með þeim öllum samtímis á Skiptiborðinu á Sýn Sport Ísland.