Táningsstúlkan sem lést var að teyma ís­lenskan hest

„Við erum miður okkar vegna þessa hræðilega slyss sem átti sér stað á jörðinni okkar í gær. Hugur okkar er hjá fjölskyldu og vinum Silju,“ segir í færslu á samfélagsmiðlum Stald Gavnholt, hrossaræktarbúinu þar sem slysið átti sér stað.

„Allir hjá Stald Gavnholt syrgja þessa ungu yndislegu stúlku sem unni hestum og fyllti þá sem umgengust hana af ánægju. Við erum þakklát fyrir hlýhug og stuðninginn frá hestasamfélaginu.“

Hjá Stald Gavnholt eru fyrst og fremst íslenskir hestar. Agnar Snorri Stefánsson, hrossabóndi hjá Stald Gavnholt, staðfestir við fréttastofu að stúlkan, sem var sextán ára gömul, hafi verið með íslenskum hesti þegar slysið varð.

Efnt hefur verið til fjáröflunar fyrir fjölskyldu stúlkunnar. En fyrirhugað er að fjármagninu verði til að mynda varið í jarðarför og minningarstund.