Markadrottning af­greiddi mót­herja Ís­lands í síðasta leik fyrir EM

Finnska liðið hitaði upp fyrir Íslandsleikinn með því að mæta sterku liði Hollendinga. Holland vann leikinn 2-1. Finnar minnkuðu muninn í uppbótartímanum. Markið skoraði Oona Siren, liðsfélagi Dagnýjar Brynjarsdóttur hjá West Ham.

Markadrottningin Vivianne Miedema skoraði tvívegis fyrir Holland í fyrri hálfleiknum, það fyrra á 11. mínútu en það seinna á 30. mínútu.

Þetta voru mörk númer 98 og 99 hjá Miedema fyrir hollenska landsliðið en hún er með meira þrjátíu marka forskot á næstmarkahæstu landsliðskonu Hollendinga frá upphafi.

Hundraðasta markið kemur ekki fyrr en í fyrsta lagi á Evrópumótinu því hún var tekin af velli á 62. mínútu.

Hollendingar eru í svaka riðli á EM með bæði Englendingum og Frökkum.

Ísland og Finnland mætast 2. júlí næstkomandi í opnunarleik Evrópumótsins en íslensku stelpurnar spila síðasta leik sinn fyrir mótið á móti Serbíu á morgun.

Finnska liðið hefur verið að gera ágæta hluti en þetta var fyrsta tap liðsins í sex leikjum. Mótherjarnir hafa aftur á móti ekki verið úr hópi þeirra sterkustu.