Furðar sig á fjar­veru Lárusar Orra: „Finnst þetta skrítið“

ÍA greindi frá ráðningu Lárusar Orra út yfir­standandi tíambil á laugar­dags­morgni og tekur hann við stjórnar­taumunum af Jóni Þóri Hauks­syni. ÍA, sem vermir botns­æti Bestu deildarinnar átti leik á heima­velli gegn Stjörnunni rúmum sólar­hring seinna en í stað þess að vera á hliðar­línunni í þeim leik sat Lárus Orri hjá og Dean Martin að­stoðarþjálfari, sem var einnig að­stoðarþjálfari í tíð Jóns Þórs, stýrði liði ÍA.

„Af hverju tók Lárus Orri ekki bara þennan leik?“ spurði Baldur í Stúkunni. „Mér finnst þetta bara vera leikur sem fór í súginn. Mögu­leg þrjú stig. Það er til­kynnt um ráðningu hans á laugar­dags­morgni. Ég er hundrað pró­sent viss um að ef Lárus Orri hefði setið hérna þá hefði hann sagt: „Hvaða kjaftæði er þetta?“

„Þú ert mættur þarna á laugar­dags­morgni, taktu bara æfingu með liðinu og vertu með leikinn. Berðu lífi í strákana og fáðu þá strax inn. Það er kannski bara það eina sem þarf, smá fersk­leika. Mér finnst þetta skrítið,“ sagði Baldur og spurði félaga sína í settinu hvort það væri bara honum sem þætti þetta skrítið.

„Nei nei,“ svaraði Ólafur Kristjáns­son og hélt svo áfram. „Stjórn knatt­spyrnu­deildar ÍA tekur þá ákvörðun að Jón Þór eigi að hætta. Dean Martin er búinn að vera með honum og tekur leikinn gegn Stjörnunni. Það má alveg ræða það af hverju Lárus Orri tók ekki leikinn. Þurftu leik­mennirnir kannski, fyrst að þessi ákvörðun var tekin, að fá nýju röddina bara inn strax þannig að það væri farið inn í þennan leik með hreint blað. Það er ekki mikið sem þjálfari getur gert á þessum litla tíma en kannski bara það að fá hann inn í klefann, og vera röddin í klefanum fyrir þennan leik, hefði kannski geta gert eitt­hvað. En nú sitjum við eftir leik og þessa niður­stöðu að ræða um þetta. Það er aldrei nein ein leið rétt í þessu en þetta er vissu­lega punktur sem má velta upp og ræða.“

Nánari um­ræðu í Stúkunni um komandi þjálfaratíð Lárusar Orra með lið ÍA má sjá hér fyrir ofan.