Fótbolti

For­seta­hjónin fengu EM-treyjur frá stelpunum okkar

Sindri Sverrisson skrifar
Forsetahjónin verða númer 7 og 8 á Evrópumótinu í sumar. Landsliðskonurnar virtust skemmta sér vel í heimsókninni til þeirra.
Forsetahjónin verða númer 7 og 8 á Evrópumótinu í sumar. Landsliðskonurnar virtust skemmta sér vel í heimsókninni til þeirra. @halllatomas

EM kvenna í fótbolta hefst eftir aðeins tíu daga og nú er búið að tryggja að íslensku forsetahjónin geti klæðst landsliðstreyjum á mótinu.

Margar af stelpunum okkar í íslenska landsliðinu heimsóttu Bessastaði og afhentu þar þeim Höllu Tómasdóttur forseta og eiginmanni hennar, Birni Skúlasyni, sérstakar EM-treyjur.

Halla Tómasdóttir forseti fær hér afhenta EM-treyju frá landsliðsfyrirliðanum Glódísi Perlu Viggósdóttur.@hallatomas

Um er að ræða hvíta varabúninginn sem að Puma framleiddi sérstaklega vegna EM kvenna og voru treyjurnar merkar „Tómasdóttir“ og „Skúlason“.

Þær landsliðskonur Íslands sem leika með liðum í vetrardeildum hafa margar verið að æfa saman á Íslandi undanfarna daga. Þær sem spila í Bestu deildinni eru nú einnig komnar í landsliðshlé og síðustu leikirnir fyrir hlé í sænsku úrvalsdeildinni eru í dag.

Íslensku landsliðskonurnar sem heimsóttu forsetahjónin á Bessastaði.@hallatomas

Íslenski hópurinn heldur svo til Serbíu á morgun og spilar þar vináttulandsleik við heimakonur á föstudaginn áður en EM hefst í næstu viku. Ísland mætir Finnlandi í fyrsta leik, miðvikudaginn 2. júlí, því næst Sviss 6. júlí og svo Noregi 10. júlí. Tvö af þessum fjórum liðum komast svo áfram í 8-liða úrslit EM og þangað ætlar íslenska liðið sér.

Landslið kvenna í fótbolta EM 2025 í Sviss

Mest lesið


Fleiri fréttir

Sjá meira


×

Mest lesið