Á­horfið minnkaði um 55 prósent eftir að Caitlin Clark meiddist

Margir innann WNBA fjölskyldunnar hafa verið að reyna tala niður mikilvægi Caitlin Clark fyrir deildina en tölurnar sýna heldur betur annað.

Clark náði aðeins að spila fjóra fyrstu leiki tímabilsins áður en hún meiddist. Hún hefur ekki spilað síðan.

Miðaverð hefur hrunið á leiki Clark en áhorf og umfjöllun hefur minnkað gríðarlega.

Nú eru komnar í hús tölur yfir sjónvarpsáhorf á leiki WNBA og samkvæmt hinum frægu Nielsen mælikvarða þá hefur áhorfið á WNBA deildina minnkað um 55 prósent síðan að Caitlin Clark meiddist.

Áður en hún meiddist voru 1,8 milljónir að horfa á leikina en aðeins 847 þúsund manns síðan hún datt út.

Í þessum fjórum leikjum Clark með Indiana Fever þá var hún með 19 stig, 9,3 stoðsendingar og 6,0 fráköst að meðaltali í leik.

Það styttist í það að Clark komi til baka og hún er byrjuð að æfa. Indiana Fever ætlar hins vegar að fara varlega og ekki flýta sér með sinn besta leikmann.

Það er aftur á móti örugglega mikil pressa frá öllum að sjá hana sem fyrst inn á vellinum því WNBA deildin þarf greinilega á sinni langstærstu stjörnu að halda.