Veður

Glittir í endur­komu sumarsins

Rafn Ágúst Ragnarsson skrifar
Bráðum verður hægt að sleikja sólina í hádegismatnum á ný.
Bráðum verður hægt að sleikja sólina í hádegismatnum á ný. Vísir/Vilhelm

Það glittir í endann á því hreti sem hrellt hefur landann undanfarna daga. Eftir hlýjasta maí í manna minnum kyngdi niður snjó og trampólín tókust á loft um leið og júní bar að garði. Nú sér loks í ljósið að sögn veðurfræðings.

Einar Sveinbjörnsson segir að svalt verði um hvítasunnuhelgina en að þó muni víða sjást til sólar, einkum sunnan- og vestanlands. Á miðvikudaginn næsta séu hins vegar breytingar í kortunum. Í stað norðvestanáttar í háloftunum verður hann sunnanstæður og bleyti loks í sunnan- og suðvestantil.

Það kyngdi niður snjó víða um land í vikunni.Veðurstofa Íslands

Einar bendir á tvö kort sem sýna annars vegar veðuraðstæður í gær og hins vegar eftir viku, föstudaginn þrettánda. Það fyrra sýnir kalda tungu úr norðri með -4 gráðum í 850 hPa. Þykktin gælir við hita um frostmark jafnvel á láglendi. Eftir viku verði allt annað uppi á teningnum.

Það hlýnar í veðri á miðvikudaginn.Veðurstofa Íslands

„Þykktin gefur til kynna 15-20 stiga hita ef sólin nær að skína,“ segir hann.

„En það sem mestu skiptir er snúningurinn og veðurbreytingin sem í vændum er fljótlega eftir hvítasunnuhelgina. Hlýnandi veður og nýja snjóinn til fjalla tekur vonandi fljótt upp,“ segir Einar Sveinbjörnsson veðurfræðingur.

Veður

Mest lesið


Fleiri fréttir

Sjá meira


×

Mest lesið