Bannar nú er­lenda nem­endur í Harvard á grunni þjóðaröryggis

Í síðasta mánuði felldi Trump úr gildi heimild skólans til að fá landvistarleyfi fyrir erlenda nemendur. Sú aðgerð var úrskurðuð ólögleg í síðustu viku.

Nú hefur Trump skrifað undir forsetatilskipun sem hefur í raun sömu áhrif. Í tilskipuninni segir Trump ógna þjóðaröryggi Bandaríkjanna að leyfa Harvard að taka við erlendum nemendum og hýsa þá.

Vísaði hann til sömu lagaheimildar og hann vísaði í annarri forsetatilskipun sem hann skrifaði undir í gær, þar sem hann meinaði íbúum tólf ríkja að ferðast til Bandaríkjanna. Í forsetatilskipunni er einnig vísað til annarra laga, þeirra á meðal laga sem snúast um að banna fólki sem bendlað er við hryðjuverkasamtök um að ferðast til Bandaríkjanna.

Sjá einnig: Endurvekur ferðabannið

Um 6.800 nemendur skólans á þessu skólaári koma erlendis frá eða rétt rúmur fjórðungur allra nemenda. Þessir nemendur borga heilt yfir hærri skólagjöld en bandarískir nemendur og eru skólanum mikilvæg tekjulind.

Enn eitt ólöglegt útspilið

Trump og hans fólk hafa gengið hart fram gegn Harvard og öðrum skólum í Bandaríkjunum að undanförnu. Deilurnar hafa að miklu leyti snúist um umfangsmikil mótmæli í bandarískum háskólum gegn hernaði Ísraela á Gasaströndinni.

Markmið Trump-liða er meðal annars að fá forsvarsmenn skólans til að breyta stjórnarháttum, ráðningum og inntökuskilyrðum. Forsvarsmenn margra annarra skóla hafa orðið við kröfum ríkisstjórnarinnar.

Stjórnendur Harvard hafa ekki viljað gera það og hafa höfðað nokkur mál gegn ríkisstjórninni. Þeir segja aðgerðir hennar gegn skólanum ólöglegar. Það sama segja þeir um þetta nýjasta útspil Trumps.

Talsmaður skólans segir í svari við fyrirspurn Washington Post þessi nýjasta forsetatilskipun Trumps sé enn eitt ólöglegt útspil forsetans og það brjóti gegn stjórnarskrárvörnum réttindum skólans. Forsvarsmenn skólans muni áfram standa vörð um alþjóðlega nemendur hans.