Sænsku stelpurnar fóru illa með þær dönsku og eru komnar i úr­slit

Svíar unnu leikinn 6-1 eftir að jafa verið 4-1 yfir í hálfleik.

Sænska liðið endar riðilinn með tólf stig en Ítalir náðu öðru sætinu af Dönum með 4-1 sigri á Wales á sama tíma. Danir hefðu tryggt sér sigur í riðlinum með sigri en tap þýðir að liðið endar í þriðja sætinu og fer í umspil um að halda sæti sínu í A-deildinni.

Svíþjóð spilar til úrslita í Þjóðadeildinni ásamt Þýskalandi, Frakklandi og Spáni sem unnu líka sína riðla.

Stina Blackstenius, nýkrýndur Evrópumeistari með Arsenal, skoraði þrennu fyrir Svía í leiknum þar af fyrsta mark leiksins strax á fyrstu mínútu.

Hin mörkin skoruðu þær Johanna Rytting Kaneryd, Filippa Angeldal og Lina Hurtig. Þær dönsku réðu ekkert við Blackstenius sem lagði einnig upp mark Angeldal.

Janni Thomsen minnkaði muninn í 3-1 fyrir Dani undir lok fyrri hálfleiks en það var samt tími fyrir Blackstenius að koma Svíum aftur þremur mörkum yfir fyrir hálfleiksflautið.