Mætti með steikarhníf á leik­skóla

Þetta er meðal þess sem kemur fram í dagbók lögreglunnar á höfuðborgarsvæðinu þar sem verkefni dagsins eru reifuð.

Grétar Stefánsson, aðalvarðstjóri hjá lögreglunni á höfuðborgarsvæðinu segir að maðurinn hafi verið illa áttaður og sennilega ekki gert sér grein fyrir því að hann væri á leikskóla. Maðurinn sé fullorðinn, hugsanlega á þrítugsaldri.

„Það er ekki búið að taka skýrslu af honum enn, við bíðum bara eftir því að ástand hans lagist. Hann bað eitthvað um að fá að hringja, en starfsfólkið brást rétt við, það var engin ógn af honum eða neitt. Er ekki viss um að hann hafi áttað sig á því að hann væri með hníf á sér,“ segir Grétar.

Meðal annarra verkefna lögreglunnar í dag var vinnuslys í Hafnarfirði þar sem maður datt úr stiga og fékk áverka á brjóstkassa. Maðurinn var fluttur á bráðamóttöku með sjúkrabifreið til frekari skoðunar.

Í Hlíðunum í Reykjavík var tilkynnt um umferðaróhapp þar sem rafmagnshlaupahjól og bifreið skullu saman. Ökumaður rafhjólsins meiddist á fæti.

Í Breiðholti var kona í annarlegu ástandi handtekin í fyrir að fara ekki að fyrirmælum lögreglu og sparka í lögreglumann.

Fréttin hefur verið uppfærð