Um­ferðar­tafir vegna fram­kvæmda við Kringlumýrar­braut í sumar

Framkvæmdasvæðið nær frá gatnamótum Kringlumýrarbrautar og Miklubrautar og að gatnamótum Kringlumýrarbrautar og Háaleitisbrautar. Miðeyjan verður minnkuð, girðingin þar fjarlægð og vegrið sett upp í staðinn. Með smærri miðeyju er hægt að koma fyrir nýrri akrein með akstursstefnu í suður. Á sama tíma verður hægri akreinin í suðurátt gerð að forgangsrein fyrir strætisvagna.

Vonir standa til að framkvæmdir hefjist á næstu dögum að sögn segir Cecilía Þórðardóttir, verkefnastjóri hjá Vegagerðinni.

„Að loknum framkvæmdum verða áfram tvær akreinar í suðurátt fyrir almenna umferð, auð auki sérakreinar fyrir strætó,“ segir Cecilía.

Viðbúið er að það verði einhverjar tafir á svæðinu í sumar. Allur kaflinn verður fræstur og malbikaður upp á nýtt.

„Það verða einhverjar þrengingar og eitthvað um lokanir á einstaka akreinum. Þannig við biðjum fólk um að sýna því tillitssemi og biðlund,“ segir Cecilía.

Stefnt er á að framkvæmdum ljúki um miðjan ágúst, áður en umferðin nær hámarki á ný. Sem fyrr segir verður einungis ný akrein með akstursstefnu í suður, en til skoðunar er einnig að bæta við akrein til norðurs.

„Við skoðum það svo í framhaldinu,“ segir Cecilía.

Þá að bæta við strætóakrein til norðurs líka?

„Já, við stefnum á það.“