Of snemmt að segja til um hvort vaxtalækkunarferlinu sé lokið í bili

Á fundi peningastefnunefndar Seðlabankans í morgun var tilkynnt að vextir yrðu lækkaðir um 0,25 punkta. Verðbólga hafi mælst 4,2 prósent í apríl og minnkað töluvert frá því hún var mest fyrir tveimur árum. Spáir bankinn því að hún muni haldast nálægt fjórum prósentum út árið og taka síðan að hjaðna frekar í átt að tveggja prósenta markmiði. Ásgeir Jónsson seðlabankastjóri segir bankann stíga varfærið skref með lækkuninni en greiningaraðilar voru ekki sammála í spám sínum um það hvort bankinn myndi lækka vexti eða halda þeim óbreyttum.

„Við teljum það að við höfum núna séð töluvert mikla kólnun í hagkerfinu, höfum séð verðbólgu lækka töluvert á síðustu tólf mánuðum og höfum lækkað vexti samhliða því að verbólga hefur lækkað, þessi þróun hefur verið að halda áfram, þetta eru 25 punkta lækkun sem er kannski ekki mikil breyting, það eru þrír mánuðir í næstu ákvörðun þannig við teljum þá þróun síðustu mánaða hafa gefið innistæðu fyrir þessari lækkun.“

Óvissa um verðbólguhorfur sé þó áfram mikil, þá ekki síst vegna vendinga í alþjóðlegum efnahagsmálum þar sem horfur hafa verið á tollastríði. Ásgeir segir of snemmt að segja til um hvort vaxtalækkunarferlinu sé lokið í bili en nefndin telur að verðbólga þurfi að hjaðna töluvert til viðbótar áður en vextir verði lækkaðir að nýju.

„Við þurfum bara að sjá hvað gerist í sumar. En ég tel að það sé alveg ljóst ef að verðbólga verði bara föst á þessu bili sem hún er núna þá getum við eiginlega ekki lækkað vexti meira ekki nema við sjáum, það eru tvær forsendur fyrir því að halda áfram að lækka vexti, í fyrsta lagi að verðbólga gangi niður eða þá að við séum þá að sjá merki um mikinn samdrátt í efnahagslífinu sem leiðir til þess að við séum að sjá verulega kólnun.“