Senda farandfólk frá Asíu til Suður-Súdan

Talið er að um sé að ræða allt að tólf manns og voru þau færð í flugvél í Texas í dag og flogið af stað til Afríku. Lögmaður eins þeirra hefur beðið dómara um að koma í veg fyrir brottflutninginn. Hann sagðist samkvæmt Reuters ætla að íhuga að skipa ríkisstjórninni að snúa flugvélinni við.

Sameinuðu þjóðirnar hafa varað við öryggisástandinu í Suður-Súdan og að spenna þar geti leitt til þess að borgarastyrjöld sem lauk árið 2018 blossi upp á nýjan leik.

Umræddur dómari hafði áður komist að þeirri niðurstöðu að yfirvöld mættu ekki flytja flótta- og farandfólk til annarra ríkja en upprunalanda þeirra, án þess að þau fengju fyrst að mæta í dómsal og verjast brottflutningnum. Þá var verið að flytja fólk frá Víetnam, Laos og Filippseyjum til Líbíu.

Mega ekki flytja fólkið til upprunalanda

Þetta er í kjölfar þess að heimavarnaráðuneyti Bandaríkjanna skipaði í febrúar starfsmönnum að finna leiðir til að flytja farand- og flóttafólk sem ekki má flytja til heimalanda þeirra til annarra ríkja í staðinn.

Dómarinn sagði að ekki mætti brjóta á stjórnarskrárbundnum rétti fólks til réttlátrar málsmeðferðar.

Umrædd réttindi kallast „habeas corpus“ og fela í sér að ekki sé hægt að fangelsa einstaklinga án þess að þeir séu leiddir fyrir dómara og án þess að viðkomandi fái réttlæta málsmeðferð. Kveðið er á um þennan rétt í stjórnarskrá Bandaríkjanna.

Þetta á við alla sem eru í Bandaríkjunum, hvort sem þeir eru borgarar eða ekki.

Einn nánasti ráðgjafi Trumps lýsti því nýverið yfir að verið væri að skoða leiðir til að leggja þennan rétt til hliðar, á grunni þess að flæði farand- og flóttafólks til Bandaríkjanna væri í raun innrás.

Var það eftir að Trump sjálfur sagði þennan rétt fólks standa í vegi hans varðandi ætlanir um að vísa milljónum manna úr landi.

Trump og ráðgjafar hans hafa ítrekað haldið því fram að flæði farand- og flóttafólks yfir landamæri Bandaríkjanna sé í raun innrás. Á þeim grunni hefur ríkisstjórnin notast við aldagömul lög sem á ensku kallast „Alien enemies act“ til að vísa fólki úr landi og í mörgum tilfellum án þess að það hafi fengið réttmæta málsmeðferð.

Sjá einnig: Getur frelsað El Salvador-fangann en vill það ekki

Lög þessi eru helst þekkt fyrir að hafa verið notuð á tímum seinni heimsstyrjaldarinnar til að setja bandaríska ríkisborgara sem áttu rætur að rekja til Japan, Þýskalands eða Ítalíu í fangabúðir.

Ráðherra sneri réttinum á hvolf

Kristi Noem, fyrrverandi ríkisstjóri Suður-Dakóta og núverandi heimavarnaráðherra, var spurð að því á þingi í dag hvort hún vissi hvað habeas corpus væri. Hún staðhæfði að um væri að ræða stjórnarskrárbundinn rétt forsetans til að vísa fólki úr landi og til að „svipta fólk réttinum til…“

Hún var stöðvuð áður en hún kláraði svarið.

Reuters sagði einnig frá því í dag að fólk sem er í Bandaríkjunum ólöglega hafi fengið mjög háar sektir á undanförnum dögum. Ein þeirra, sem á son sem er bandarískur ríkisborgari, var sektuð um 1,8 milljónir dala.

Lögmenn sem rætt var við segja að fólk hafi verið sektað allt frá nokkrum þúsundum dala upp í 1,8 milljónir. Fólkinu var sagt að það hefði þrjátíu daga til að mótmæla sektinni og færa rök fyrir því af hverju þau ættu ekki að þurfa að greiða hana.

Með þessu vilja meðlimir ríkisstjórnar Trumps þrýsta á fólk til að yfirgefa Bandaríkin sjálft.