Fyrsta háhælahlaup Ís­lands­sögunnar

Þá eru hlauparar hvattir til þess að grípa með sér háhælaða skó, því keppt verður í 50 m háhælahlaupi í fyrsta sinn í Íslandssögunni.

„Við hvetjum öll til að taka þátt í háhælahlaupinu! Þetta verður alvöru keppni, enda mæta nokkrar dragdrottningar á svæðið. 

Veitt verða verðlaun bæði fyrir besta tímann og fyrir tígulegustu tæknina. Það er því um að gera að spreyta sig og hafa gaman,“ segir Kári Garðarsson, framkvæmdastjóri Samtakanna ´78, en samtökin standa að Hamingjuhlaupinu í samstarfi við Kristal.

Hlaupið hefst við Elliðaárstöð og svæðið opnar klukkan 10 þar sem DJ Sunna Ben tekur á móti fólki með tónlist og miklu stuði. Á svæðinu verður glimmerstöð þar sem hægt er að glimmera sig í gang fyrir hlaupið - eða fyrir þau sem vilja skína á hliðarlínunni og hvetja hlauparana áfram.

Bjarni Snæbjörns og Helga Haralds, kynnar hlaupsins, ætla að hita upp mannskapinn og Páll Óskar tekur nokkur lög. Ölgerðin gefur þátttakendum Kristal enda helsti styrktaraðili hlaupsins. „Þetta er frábær leið til að byrja laugardaginn sinn,“ segir Kári.

Kári segir tilgang Hamingjuhlaupsins felast í nafni þess og með því vilja samtökin undirstrika frelsi fólks til að vera það sjálft, og að fjölbreytileiki sé fagnaðarefni.

„Hlaupið er haldið 17. maí, á alþjóðlegum degi gegn hinseginfordómum. 

Við viljum með þessu senda skýr skilaboð um að samfélagið okkar er staður þar sem ástin ræður ríkjum, að fjölbreytileiki er fagnaðarefni og að við eigum öll að geta lifað lífinu frjáls og óhrædd. 

Við stefnum að því að gera Hamingjuhlaupið að árlegum viðburði,” segir Kári. Skráning í hlaupið er í fullum gangi og þær hrannast inn. 

„Við búumst við um 300 manns og ef veðurspáin helst svona góð þá er aldrei að vita nema fleiri láti sjá sig,“ segir Kári, en spáð er 17 stiga hita og sól á laugardaginn. Skráning fer fram á hamingjuhlaupid.is og hægt er að skrá bæði fullorðna og börn.